E di 61 aniversario di ASU Olimpiada a inicia diadomingo ultimo den e Centro Deportivo Betico Croes na Sta Cruz. Miembronan di e directiva di ASU, hunto cu e invitadonan den presencia di e demas federacionnan y nan atletanan tabata presente na e ceremonia di apertura.
Presidente di ASU, Sr. Gerald Franca a hiba palabra na e bunita ocasion aki unda e la recorda e 61 aña cu Aruba Sport Unie ta contribui na e formacion di nos mucha y hobennan pa nan bira un bon cuidadano, tur esaki atrabes di deporte. Nos por mira un gran cantidad di federacionnan deportivo cu nan bandera y/of banner a participa na e ceremonia di apertura. E desfile tabata colorido unda varios atletanan a duna un presentacion chikitona e publico presente. E tres medayistanan di e Weganan Suramericano Hubenil Santiago 2017, esta e landador Keeley Maduro cu a gana Brons, e judoka Sophia Petrocchi cu e gana Plata y su ruman e taekwondista Chiara Petrocchi cu e gana Oro a haya e honor pa cende e pebetero y asina inaugura oficialmente e ASU Olimpiada 2017.
Un danki sigur na Lotto, e Loteria di Aruba pa medio di Comision di Subsidio ta yuda subisdia e ASU Olimpiada 2017. Lotto kier a desea tur e atleta, dirigente, coach como tambe e federacionnan deportivo tur clase di exito durante di e ASU Olimpiada 2017.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
