(AP) — Sin poder, humilia, tacha di ta prome minister “spirito” y compara desfaborablemente cu un lechuga – esaki no ta un bon siman pa Liz Truss. E prome minister Britanico tabata luchando pa recupera su poder ayera despues cu su plannan economico a keda destrui y repudia pa e hefe di Tesoro cual el a haya su mes forsa pa nombra pa evita caos den mercadonan financiero.
Truss ta keda den su cargo, pa awo, en gran parti pasobra su Partido Conservador ta dividi riba con pa reemplas’e. Den un intento pa bay back na normalidad, Truss a tene un reunion di Gabinete ayera, unda segun su vocero tabatin un “discusion profundo” riba e plan economico nobo, y niun hende a pidi su retiro.
Truss tambe a reuni cu legisladornan di fraccionnan Conservador rival, argumentando cu mantene su persona al mando por duna stabilidad, maske e mester a deshaci di casi henter e prospecto riba cual a eligie lider di e partido apenas seis siman atras.
Derota pero desafiante, Truss a reconoce dialuna cu “a comete eror” – pero a insisti cu e ta bay lidera e Conservadornan den e proximo eleccion nacional.
Masha tiki ta kere esey. Prensa Britanico ta inusualmente uni den opinion cu Truss ta condena. E tabloide conservador The Sun a yam’e un “prome minister spirito” y a bisa cu “pa e bon di e pais, nos no por sigui asina.” E iskierdista The Guardian a compara e conservadornan na un tripulacion rebelde riba barco, bisando cu “Truss no a bandona su partido, pero e partido si a bandon’e.”
Despues cu The Economist a bisa cu e tempo di Truss al mando di gobierno tabata “mas o menos e duracion di un lechuga”, e tabloide Daily Star a pone un transmision en bibo di un potret di e prome minister banda di un lechuga iceberg, dorna cu un peluca blond, wowo y boca, puntrando, “Liz Truss por dura mas cu e lechuga aki? – e lechuga ya ta birando bruin despues di cinco dia.
