Dia 7 di september un caso civil hopi importante ta bay tuma luga unda cu minister di Husticia y Asuntonan Social actual Rocco Tjon a hiba e periodistanan di e programa ‘Enfoke’ Patrick Paskel y Nelson “Speed” Andrade corte pa difamacion. Loke ta haci e caso mas interesante ta cu e periodistanan ta acusa Tjon di cambia proces-verbaal tempo cu Tjon tabata funcionario di cuerpo policial; es decir, a cambia un proces-verbaal pa yuda su coleganan den cuerpo policial.
Libertad di expresion di miembronan di prensa na Aruba: articulo 10 EVRM
Na Aruba, vooral e miembronan di prensa ta gosa di libertad di expresion, pero e no ta sin limite. Periodismo tin reglanan cu corte ta tene na cuenta cune entre otro “Het beginsel van hoor en wederhoor, ” cu ta un principio di journalistiek cu, na momento cu ta acusa un persona di algo, prome cu publicacion, mester duna e persona cu ta acusa e derecho di replica, derecho pa defende su mes contra e acusacion. E principio di hoor en wederhoor no ta absoluto. Un periodista por publica of acusa un persona sin cu duna e persona derecho pa replica si e tin un documento of otro tipo di prueba pa sostene su acusacion. E por ta referi su mes na otro articulo, den e caso specifico aki, e periodistanan di Enfoke a referi na un articulo di e website Caribisch Netwerk, unda a publica un entrevista di ex-Alto comisario di Cuerpo Policial di Aruba, Vanessa Tjon. Riba su mes, ningun caminda Rocco Tjon su nomber a sali den e articulo aki.
Derecho di proteccion di un bon nomber: Articulo 8 EVRM
Tur ciudadano tin derecho pa protege su bon nomber. Den e caso aki e acusacion cu Enfoke a haci contra Tjon no ta tempo e tabata den calidad di minister, sino tempo Tjon tabata polis. E ta un acusacion hopi delicado y fuerte contra su persona cu na momento aki e ta fungi como minister di Husticia, cu ta un funcion publico y lo haci e caso aki mas interesante.
Rocco Tjon su declaracion riba Facebook
Dia 3 di augustus ultimo, e mandatario a reacciona tocante e caso aki indicando lo siguiente:“Durante noticiero riba canal 88.9, a traves di e programa Enfoke, Patrick Paskel a bolbe menciona cu mi persona tabata sospechoso y a ser deteni door di landsrecherche tempo cu mi tabata eherce mi funcion den Cuerpo Policial. E biaha aki a referi na un caso specifico y a menciona nombernan di Agentenan Policial cu tabata envolvi.
“Na prome luga mi kier bisa cu durante mi carera, trahando pa 17 aña den Husticia, mi a traha na diferente departamento den Cuerpo Policial y tambe mi a traha como director di KIA. Den mi funcion como hefe di e diferente departamentonan y como director di KIA mi a duna na diferente ocasion declaracion na Landsrecherche y na BIV den diferente caso.
“Por medio di e comunicado aki, mi ta BOLBE desmenti rotundamente tur cos cu a ser treci padilanti, durante e programa “Enfoke”, cu mi persona NUNCA a participa, tabata sospechoso of a ser deteni den ningun caso cu nan a trece pa dilanti. Ni den e caso cu a trece pa dilanti den nan programa di diamars 1 di augustus, ni den e caso cu nan a trece pa dilanti ayera 2 di augustus. Mi nunca tabata deteni na Landsrecherche, sigur no pasobra mi no tabata integro den mi funcion anterior.
“Por ultimo mi kier bisa cu e documentonan cu ta ser referi na dje y cu a ser mustra den nan programa ta documentonan di e caso di mi prome yiu. Documentonan cu mi mes a publica riba mi pagina di Facebook y a comparti cu Parlamento despues cu mi a huramenta como minister di Husticia y Asuntonan Social.
Ta trata un biaha mas di mentiranan indignante, pa es motibo, un keho penal ya caba a ser entrega debidamente en contra di esaki. Adicionalmente mi por agrega cu pasonan legal (civil) tambe lo ser tuma.”
E caso mes unda Enfoke ta acusa Rocco Tjon di cambia Proces-Verbaal
Segun e website Caribisch Netwerk a publica dia 13 di februari di 2015, na aña 2013 a reporta cu e tres ex-agente policial di nomber Ronald Paskel, Roselynn Angela y Elaine Lacle a tuma husticia den nan man. Lacle a perde su brommer y via via nan a tende unda e brommer por tabata. Den esaki, Ronald Paskel cu Roselynn Angela y Elaine a dicidi cu nan mes ta bay drenta arma den e cas pa busca e brommer. Aki ta unda cu Paskel a saca su pistol y a pone e persona na rudia y despues a pone su arma di candela na e persona su cabes, y e otro polisnan a listra e cas sin un orden di hues comisario; pa colmo nan no haya e brommer na e sitio unda nan a drenta ilegalmente.
E tres polis anteriormente menciona a haya castigo di prizon di entre 1 cu un aña y mey, na unda tabata prome biaha den historia cu agentenan policial tabata condena pa un delito manera esaki, segun e website a menciona.
Nota di redaccion: Ronald Paskel ta ruman di e periodista Patrick Paskel cu a acusa minister Tjon di cambia e proces-verbaal den e caso specifico aki.
