(La Republica) – Ayera 1 di december, Prome Husgado di Investigacion Preparatorio di Ica a resolve di declara cu e resolucion emiti pa Tribunal Constitucional (TC) cu tabata busca duna un amnistia na ex-presidente Alberto Fujimori, no ta ahusta na e procedura hudicial.
Dianan pasa, Corte Interamericano di Derechonan Humano (Corte IDH) a recorda na estado Peruano su mandato cu ta prohibi pa libera Fujimori, ken ta preso pa delitonan di lesa humanidad, despues cu Tribunal Constitucional a resolve cu no tabatin mester aclaria e fayo di 2022 unda a considera como valido e amnistia concedi na e ex-dictador.
Fujimori di 85 aña a ser condena na 25 aña di prison pa homicidio califica y lesion grave pa e casonan Barrios Altos na 1991 y La Cantuta na 1992 na unda a asesina 25 persona, mientras su Gobierno tabata enfrenta e guerrilla Sendero Luminoso, despues di e sentencia e ta permanece cera na e prison Barbadillo na Lima.
Fujimori ta conoci como un dictador despues di un auto golpi cu a duna 5 di april 1992 unda el a cera e Congreso inconstitucionalmente y hunto cu su asesor Vladimiro Montesinos a asumi e control total di Polis Nacional di Peru y Forsa Arma
Su siguidonan ta recordel’e como un lider di man duro cu a salba e pais di terorismo y un hiperinflacion di 7.500%, pero esnan contrario, ta afirma cu e tabata un persona dictatorial cu a disolve Congreso na 1992 y a viola derechonan humano pa mantene su mes durante un decada den e poder.
