Segun un mocion di orden di dia, Congreso di Peru tin programa entre e puntonan di debate, considera declara presidente di Venezuela Nicolás Maduro persona non grata pa e nacion aki.
E presencia di Maduro den e VIII Cumbre de Las Americas ta continua den awanan turbulento despues cu canciyer Venezolano Jorge Arreaza a comparti un invitacion bieu cu Maduro, riba cual esaki a anuncia su presencia na e cumbre, loke gobierno Peruano no a confirma.
Presidencia di Congreso Peruano a manda varios carta pa canciyeria di Peru y pa organisacion di Estadonan Americano unda nan ta splica e motibonan pa no tin presencia di e gobierno Bolivariano den e cumbre di hemisferio programa pa dia 13 y 14 di april.
Categorisa como un inconveniente presencia di e mandatario Venezolano, congreso Peruano ta haci mencion di e crisis economico y social grave den cual Venezuela ta bibando, e violacion di e Derechonan Humano di e Venezolanonan, e ehecucion extrahudicial ‘en vivo y directo’ di Oscar Perez y e sancionnan pa funcionarionan di e gobierno di Venezuela.
Den un tweet e canciyer Venezolano Jorge Arreaza a comparti un carta di invitacion di presidente di Republica di Peru, Pedro Pablo Kuczynski, na su homologo Venezolano Nicolás Maduro na e cumbre de Las Américas cu ta data di november 2017 y cu no a wordo ratifica.
E Grupo di Lima ta evalua si ta invita Maduro na e cumbre na cual ta asisti tambe e presidente di Merca, Donald Trump, e canciyer Peruano Cayetana Aljovín a señala, declaracion cu a coincidi cu e bishita na Peru di secretario di estado di Merca, Rex Tillerson, dialuna y diamars recien pasa.
Mientras tanto presidente Kuczynski a declara cu e ta haya cu presidente Maduro por asisti, pero lo wak ta conta ricibie.
