(Infobae) – Ayera diahuebs Gobierno Peruano a bati alarma sanitario pa expansion di monkeypoxdebi na e casonan detecta rond di mundo, aunke autoridadnan di e pais Andino te ainda no a registra contagio na su teritorio.
“Nos ta declarando alerta, for di awe, aunke ainda nos no tin ningun caso, pero nos ta declarando alerta pa preveni cualkier eventualidad”, Jorge Antonio Lopez minister di Salud a declara den un conferencia di prensa.
E alerta aki ta implica “pa poblacion cuida su mes ” y haci un monitoreo continuo, e minister a aclaria y a destaca cu nan ta evaluando e compra di vacunanan contra bruela.
Pero kico e malesa aki ta? Bruela di macaco, of “Monkeypox” a ser confirma na varios paisnan di Europa y Merca, e casonan ta aumentando. E prome casonan humano a identifica na Republica Democratico di Congo na 1970 y e number a sigui crece den ultimo decada na paisnan di Africa occidental y central.
Den actualidad, e prome caso reciente a ser identifica dia 6 di mei na Reino Uni.
Segun Organisacion Mundial di Salud (OMS) cu diamars ultimo a anuncia cu nan kier aclaria cu ayudo di Reino Uni cu e casonan di bruela aki detecta for di comienso di mei, ta entre e comunidad homosexual den nan mayoria.
For di 6 di mei, a detecta shete caso di bruela aki na e pais ey, di nan cuater hende ta identifica nan mes “homosexual, bisexual of homber cu tin relacion sexual cu otro homber”, segun nan a afirma.
“Nos ta wak e transmision entre hende homber cu tin relacionnan sexual cu otro hende homber”, lo cual ta “un informacion nobo cu nos mester studia di un manera adecua pa compronde miho e dinamica” Ibrahima Soce Faal director general di OMS a bisa.
Tambe nan ta recomenda “particularmente na esunnan cu ta defini nan identidad sexual como gay, bisexual, pa keda alerta riba cualkier alergia of lesion inusual”.
