Manera Bon Dia Aruba a publica dialuna ultimo, piscadonan di area di Waf’i Rancho a tene un reunion pa un biaha mas expresa nan preocupacion tocante e desaroyonan cu e area aki ta hayando.
Clifford Rosa, representante di e piscadonan y algun persona di e comunidad cu tambe tabata presente, a informa cu e reunion a bay hopi bon pa cual nan lo bay tene un otro reunion mañan diahuebs pa sigui negocia.
El a expresa cu ya caba nan tin un aña negociando y na e momentonan aki e situacion no ta bayendo mucho bon, manera a bira conoci diabierna ultimo. Nan a un carta di e compania cu ta construyendo y remodelando e area aki y a informa e piscadonan di esaki pa nan wak kico ta bay haci.
Pa e proximo reunion nan lo reuni cu expertonan pa asina por canalisa kico lo ta e documento cu nan lo entrega na gobierno, pa motibo cu nan kier puntra kico lo sucede cu e area ey cu a wordo dividi den diferente parcela, con esey lo bay y na ken nan ta pertenece.
Como representante di Fundacion Rancho, Rosa a bisa cu e ta para banda di e piscadonan y tambe di esunnan cu ta apoya e balor historico cultural cu e area tin cu nan ta purba conserva di e manera mas original posibel.
Tambe, el a bisa cu Aruba Port Authority (APA) ta esun cu ta maneha e waf pero e parti na unda e botonan ta para por ehempel, ta pertenece na Infrastructura y e otro ta di otro departamento.
“E cos ta asina complica cu riba un pida chikito tindiferente mandatario riba cada un di nan y p’esey nos kier clarificacion for di e ministernan concerni, den caso aki Dangui Oduber di Turismo, Marisol Lopez-Tromp di Infrastructura y Chris Romero di Transporte, pa wak con e cos ta hinca den otro y con por sigui negocia”.
E area aki ta un area cu ta hopi pidi pa piscadonan por para nan boto y ta p’esey cu nan tin nan exigencianan basico y cu e punto principal di cu e area aki ta importante pa comunidad di Aruba.
Tambe el a señala cu den e area tin 5 boto cu ta sali tur mainta pa bay pisca pa nan por cria nan famia. Rosa ta kere cu nan ta esunnan cu regularmente ta subi lama pa traha y cu nan ta biba di pesca y cu nan lo kier sigui biba di pesca tambe.
