Tin un ley cu no a cay den bon tera cerca e piscadonan representa pa Centro di Pesca Hadicurari (SCPH) y tambe cerca departamento di Santa Rosa (LVV) cu ta atende cu e maneho y desaroyo di e sector primario di agricultura, cria y pesca.

Pa tal motibo awe tur piscadonan te esunnan di baranca y nan famia ta wordo invita pa un reunion urgente pa 7:30 p.m na Piedra Plat Entertainment Center pa pidi e coreccion di e ley aki.

E ta trata di e ley cu recientemente gobierno a publica AB. 2017, no. 48. Minister di Medio Ambiente y su Departamento di Naturalesa y Medio Ambiente, a uza como argumento e CITES y of SPAW protocol. Un ehempel ta kreeft, e ta unicamente nombra den e protocol SPAW (tabel iii). Pero SPAW (tabel iii) y mayoria di protocolnan ta urgi regulacion, pero no prohibicion. E manera cu nan a introduci ta resulta desproporcional y inhusto contra piscado aki na Aruba, asina Departamento di Santa Rosa y Centro di Pesca Hadicurari a yega di trece dilanti.

Protocol

Ta diferente e argumentonan cu nan ta trece dilanti pa gobierno por cambia nan decision inicial. Entre otronan: E protocol(nan) ta papia di traha cu grupo di interes (stakeholders), loke no a pasa aki. Gobierno y su departamento concerni no a papia debidamente y habri cu e piscadonan local. E protocol(nan) ta papia di conscientisacion, cual tampoco a tuma luga aki. E protocol(nan) ta papia di tene cuenta cu situacionnan manera cultura, tradicion y caracteristicanan local di e especie, esaki no ta e caso aki. E protocol(nan) ta papia di haci estudionan regular, no tabata tin estudio debido na Aruba. Aki no a tuma consehonan di LVV y SCPH den e ley. Protocolnan no ta un obligacion pa prohibicion, pero ta urgi gobierno(nan) local pa implementa regulacion pa yuda protege.

Protocolnan internacional tin diferente tabel pa abarca diferente nivel di proteccion. Masha poco ta prohibi totalmente y ta laga cada pais y autoridad local defini con e ta implement’e. Ta na Aruba so, kier automaticamente prohibi tur especie cu tin riba cualkier protocol mundial cu Hulanda ratifica. Poco pa no bisa ningun pais den henter Caribe a bay den e extremo di prohibi kreeft of otro especienan. Gran mayoria y luganan manera e.o. Florida, Saba bank of Boneiro, unda si a studia e especienan, a scoge pa trece regulacion of zonificacion unda ta permiti captura. Na Aruba a sosode net lo contrario.

E legislacion aki ta contene un lista di especie pa protege nan. Varios especie nobo, awor ta prohibi, entre nan piscanan di nos consumo regular y tambe piscanan cu nan ta uza como as, locual ta afecta e piscadonan grandemente.

Especienan manera tribon, djukfes, yacupeper, manta, ta wordo haya poco biaha como un by-catch mas bien y unabes gara, ta dificil libera esakinan bek cu bida. No ta husto pa e piscado haya nan confronta cu husticia door di esaki. Kreeft, segun estudionan, no ta bou di presion door di nan biologia, esta cu nan ta reproduci jong y ta produci hopi webo. Tin estudio internacional cu ta argumenta esaki.

Piscadonan ta urgi Gobierno, particularmente, Minister encarga cu medio ambiente pa coregi inmediatamente e fayo cu e ley AB. 48 aki pa e no afecta piscadonan haciendo nan trabou, ofishi of tradicion, y asina evita cu Openbare Ministerie, departamentonan di Polis y Guarda costa mester persigui legalmente e piscadonan pa kibra e ley aki. Esaki tanten cu no coregi esaki e ley menciona.