Servicio di Impuesto di Aruba (SIA) a pidi na nan clientenan pa keda cu e plachi di 2015 ariba nan vehiculo pa motibo cu e plachi aki ta keda valido pa aña 2016, ya cu a wordo introduci e sistema di sticker. Cu excepcion di e motociclistanan cu nan si ta bay haya un plachi nobo di aña 2016 cu ta uno di color blanco cu berde, asina vocero di SIA, sra. Meverlyn Romano a declara na Bon Dia Aruba.
Actualmente tin alrededor di 2300 motociclista na Aruba. E clientenan motociclista a wordo informa cu e plachi nobo lo wordo otorga mas of menos na mita di januari, pero a presenta algun contratiempo. Aworaki SIA ta spera di entrega e plachi aki na fin di e luna aki y eventualmente na cuminsamento di februari. Segun informacion cu nan ta dispone di dje e barco ta yegando proximamente y SIA mester un poco tempo pa haci e preparacionnan.
“Asina cu nos ta cla pa otorga e plachinan pa e motociclistanan e ora nos lo emiti un comunicado”, el a declara na e medio aki.
