Aruba ta ricibi miles di turista anualmente for di Merca. Un pais cu ta nos principal mercado turistico pero cu actualmente ta pasando den un temporada pisa di flu cu a ocasiona mas cu 60 morto, specialmente muchanan. Microbiologo di departamento di Salud Publico (DGZ), Wilmer Salazar a bisa cu nan ta monitor e situacion  cu ta tumando luga no solamente na Merca, sino na Europa riba e comportacion di e virus aki.

Na Aruba nos tin flu of grip ya cu dificilmente nos por scapa di dje. Esaki ta e risico cu nos tin considerando cu nos ta un isla turistico cu ta ricibi constantemente bishitantenan di afo.  Tambe regularmente hopi hende local ta bishita Merca  y Europa. Esaki ta factornan cu ta influencia pa nos tin presencia di e virus aki. Dificilmente nos por bisa cu no ta bay haya influenza of flu of grip. Flu por ta un gran cantidad di virus. Sinembargo pa e profesionalnan riba rama di salud, flu ta un infeccion viral causa pa medio di e virus di influenza. Tin dos tipo di influenza, un ta tipo A y otro B.

Prevencion
El a bisa cu influenza tipo A tin e mayor problema pasobra e ta cambia constantemente locual  por haci cu e vacuna por ta menos efectivo. Sinembargo esaki no kiermen cu  e vacuna no ta traha, ya cu e ta traha pero cu menor efectividad. Actualmente nan tin e ultimo version di e vacuna cu tin cuater componente: Influenza A, H1N1, Influenza H3N2 y dos tipo di influenza B. E vacuna aki ta duna mas proteccion posibel, ya cu e ta duna mas proteccion cu e vacuna anterior cu tin tres componente di virus den dje.

Loke ta importante di cara na e realidad aki ta esun di minimalisa of mantene den e nivel mas abou posibel e impacto di e virus aki cerca nos poblacion, segun sr. Salazar. P’esey nan a bin cu e vacuna aki teniendo na cuenta e comportacion di e virus aki na Merca, Europa y Asia.

El a laga sa cu no solamente ta e virus di influenza ta e causa di malesa respiratorio. Ya cu tin mas virus cu ta circula den nos ambiente. Esaki ta un motibo pa kico algun persona cu a wordo vacuna contra influenza ta yega di haya grip despues. Pero e grip aki ta causa pa medio di otro virusnan. El a splica cu pa medio di e vacuna di influenza nos ta protegi  un 80% di e virus cu ta ataca e sistema respiratorio di pulmon cu ta influenza. Pero ainda tin un 20% cu ta relaciona cu otro virus cu por afecta nos curpa y esaki ta un risico menor, pero e ta un risico di por hay’e.

Plan di control
For di 2009  Aruba su autoridad di salud publico hunto cu varios partner  ta bin implementa un control mas stricto contra flu. E aña ey tabatin un situacion di temporada pisa di flu y localmente DGZ a cuminsa traha un plan integral. E plan aki ta consisti di vigilancia y monitor di flu y di otro sorto di malesa viral respiratorio.  Tur e dokternan ta na altura di e plan aki tanto dokter di cas y hospital. Tambe nan tin vigilante pa check con e movecion ta entre otro den nos area turistico entre nan hotelnan, pero tambe wafnan y aeropuerto.

Tambe sr. Salazar a bisa cu DGZ a bin cu mas vacuna ya cu e ta un di e prevencion mas efectivo. Ademas otro prevencion tin di haber cu e parti higienico pa evita e presencia di e virus of cu esaki lo por plama. E parti di vacunacion tin su efecto positivo. Nan tin full un programa di aplicacion di vacuna di forma preventivo pa e grupo di riesgo.

Nan ta duna informacion constante na comunidad pa bin aplica su vacuna no solamente esun cu tin riesgo, sino pa esun di menos riesgo tambe. E ta un servicio cu departamento di Salud Publico ta ofrece e servicio pa medio di su seccion di Malesa Contagioso,  inclusivo esaki por bay via dokter di cas.   Tambe nan ta facilita e vacuna pa e centro di cuido di nos grandinan pa brinda mas proteccion.

xxxxxxxxxxx Please hinca den un cuadro tin potretxxxxxxxxxxx

Uzo di mask
Ta recomendabel e uzo di mask como proteccion durante e temporada aki?. Nos por mira  hopi hende  cu ta bisti mask den ciudadnan grandi pa evita e virus. Sr. Salazar ta haya cu esaki ta depende di unda bo ta y kico bo kier di berdad. Ya cu e por ta algo efectivo y tambe no efectivo. E ta haya cu ta mas miho cu si e persona tin grip pa bisti su mask, e ta un actitud responsabel y preventivo. Sinembargo ta mas responsabel si e persona cu ta sinti e sintomanan di flu cu ta calafriu, keintura halto, nanishi ta core, tosamento y dolor di garganta, no sali riba caya of den luga publico y bisti mask.