Home Local Januari: 2,5% mas turista y 15,7% mas entrada camber hotel

Januari: 2,5% mas turista y 15,7% mas entrada camber hotel

227

Un total di 91.471 di turista (stay-over) a bishita Aruba na januari, cual ta .5% (+ 2.202 turista) mas compara cu e mesun luna pa 2017. Banda di esaki e hotelnan a mira nan entrada pa camber subi cu 15,7%.

Esaki oficina di turismo ATA ta informa a base di nan cifranan, di Banco Central y datonan di AHATA. Si exclui e bishitantenan di Venezuela, por mira un aumento di 8,1% (+ 6.535 turista) cual ta igual na un total di 86.935 bishitante, nan ta bisa den e relato. “E cifranan ta indica crecemento den mercadonan clave pa Aruba, manera Merca, Canada, Hulanda y Argentina.”

Turismo stay-over
Compara cu januari aña pasa, pa 2018 e turismo procedente for di e continente Norte Americano a aumenta cu 8,3% (+ 5.098 turista/total 66.727 turista) y ta trece 72.9% di total di turismo pa nos destinacion. Na januari, Merca a aumenta cu 7,4% (+ 4.091 turista/total 59.474 turista) y Canada cu 16,1% (+ 1.007 turista/total 7.253 turista) compara cu e mesun luna na 2017.

Continente Latino Americano a baha cu 18,1% (- 3.290 turista/total 14.917 turista) di cual Venezuela a baha cu 48,9% (- 4.333 turista/total 4.536 turista) compara cu januari aña pasa. Brazil a subi cu 30,7% (+ 365 turista /total 1.553 turista) y Argentina a subi cu 33,7% (+ 1.153 turista/total 4.573 turista). E continente di Latino America ta trece 16,3% di e total di turismo pa luna di januari na nos isla.

Pa loke ta Europa por nota cu turismo a aumenta cu 6,2% (+ 427 turista/total 7.284 turista) compara cu e mesun luna aña pasa. Hulanda a aumenta  cu 13,3% (+ 428 turista/total 3.655 turista), y Reinonan Uni a aumenta cu 7,5% (+21 turista/total 300 turista). Alemania a baha cu 23,5% (-133 turista/total 433 turista) E continente Europeo ta representa 8% di turismo pa Aruba pa luna di januari.

Turismo crucero
Durante januari 2018, 108.298 pasaheronan crucero a bishita nos destinacion riba un total di 53 diferente barconan crucero. Compara cu luna di januari aña pasa, turismo crucero a crece cu 20,7% (+18.564 turista crucero). Januari 2017 Aruba a haya 89.734 bishitante for di 44 crucero.

“Ademas di e cifranan aki, ta bon pa menciona cu januari y februari ta lunanan mas ocupa cu normal, debi na e aftermath di e horcannan di e ultimo kwartaal di 2017 cu a azota otro destinacionnan crucero den region Caribense”, segun ATA.

Entrada di turismo
Segun e ultimo datonan disponibel di Banco Central, ATA ta mira cu turismo den e prome 6 luna di 2017 a contribui cu 1585.6 miyon florin na nos economia. Esaki ta un aumento di 4,8% compara cu e mesun periodo na 2016.

Hotelnan
Segun Aruba Hotel and Tourism Association (AHATA) e Average Daily Rate (ADR) a aumenta cu 10% compara cu januari 2017. Esaki den cifra ta US$ 301.69 na januari 2017 compara cu US$ 331.94 na januari 2018. E entrada pa camber disponibel, e asina yama RevPAR a aumenta cu 15,7% di US$ 256.42 na januari 2017 pa US$ 296.77 na januari 2018. E anochinan ocupa (ORN) pa camber a aumenta cu 5,4% pa januari 2018. E cifranan di AHATA ta basa riba 14 propiedadnan incluyendo mayoria di tur e hotelnan cu excepcion di Hilton Aruba Caribbean Resort & Casino.