Muchanan ta creciendo den un planeta mas cayente cu lo dal na cu problemanan di salud diferente na esunnan cu nan mayornan a experimenta, segun un reporte internacional di dokternan.
Cu un aumento di malesa cu diarea, olanan di calor mas peligroso, contaminacion di aire y aumento den malesa transmiti pa sangura, manera dengue y malaria, keintamento global causa pa humano ya caba ta dañando salud publico rond mundo, segun e reporte di cambio climatico anual y salud di e journal medico The Lancet a bisa diaranson.
Pero e autornan di e reporte a bisa cu nan ta worry cu e salud futuro di e hendenan mas jong di mundo lo ta ainda pio si no disminui emision di gas di invernadero. “Un mucha naci awe, mientras e pasa den su bida lo ta exponi cada bes mas na dañonan cu ami no a experimenta”, segun co-autor di e estudio, Dr. Renee Salas, un dokter di emergencia na Boston y un profesor na Harvard. “Mi no por pensa di un emergencia di salud mas grandi”, el a bisa.
Ya caba e cantidad di dia ora condicionnan ta perfecto pa transmision di e bacteria den awa, Vibrio, un causa principal di diarea debilitante, a duplica desde añanan 1980, cu aña pasa e cantidad di dos mas grandi riba record, segun e reporte. Pa motibo di clima cayente, 29% mas di costa Mericano ta vulnerabel pa Vibrio. E reporte tambe a bisa cu e version cholera di Vibrio a aumenta cu casi 10%.
Nuebe di e 10 aña unda condicionnan tabata miho pa transmision di dengue a tuma luga desde aña 2000, e reporte ta bisa. Muchanan ta afecta mas fuertemente pa e malesanan aki. Y muchanan, hende di edad avansa, di poco recurso of enfermo ta mas afecta durante calor extremo, cu malesa respiratorio y problema di riñon.
Mientras cu medicina y salud publico a mehora a traves di e decadanan, permitiendo hende pa biba mas largo, cambio climatico ‘ta menasa pa socava tur locual nos a logra’, segun Salas.
