E siman aki a conoce un di e sucesonan mas resaltante di ultimo lunanan. Un parlamentario di e fraccion mas grandi na banda gubernamental a dicidi di bandona fraccion y partido. Cu esaki, e base di apoyo fiho di e coalicion a cambia di 12 pa 11, uno menos pero no un drama.
Naturalmente nos a scucha y lesa e argumentonan di ambos banda con nan ta mira e conflicto y no ta cuestion di bay evalua pa dicidi ta ken tin mas razon. Unda tin pleito tin dos cu a contribui na esaki.
Poniendo un banda e iritacion y mal comunicacion entre e dos bandanan, sigur na nivel personal, loke ta keda ta cu e diferencianan di opinion encuanto e ley di Serlimar tabata e piesa clave den e separacion. Den su rueda di prensa e parlamentario a duna amplio atencion na e tema aki y a splica extensamente kico ta su preocupacion den esaki. Sin embargo, asina mes e diferencia di opinion ta persisti y aki tambe e versionnan ta diferente. Ta obvio cu e parlamentario no tabata mira mas perspectiva pa sigui debati cu su coleganan riba e asunto, pa purba yega na un consenso kico ta e cambionan cu lo mester a bin den e ley, a base di amienda, pasobra ta esey ta e arma cu nan tin, conhuntamente o individual.
Awor, si di berdad tabata existi un ambiente cu ainda tabata brinda oportunidad pa actua conhuntamente den e asunto aki, no ta necesario pa nos bay purba deduci kico a pasa realmente, y mucho menos ken tin razon, pasobra tin un solucion pa esaki…ta djis un tiki pasenshi nos mester tin. Esey tur ta bin na cla den e continuacion di e tratamento den parlamento di e propuesta di ley di Serlimar, si e tuma lugar, dia e tuma lugar. Ey nos por bay mira si tin iniciativa pa bin cu amienda, sea di cual banda nan ta bin. Ta un cuestion di valora tur propuesta di amienda riba nan contenido y kico nan ta propone pa mehora. Si e partido, y su fraccion ta bisa cu por a discuti e puntonan di vista internamente y yega na consenso, ta interesante pa mira ta kico ta e puntonan cu nan ta mira den e proyecto di ley actual cu nan lo kier cambia. Si nan no bin cu nada, y ta desea simplemente di pasa pa vota e ley y ya, cla, anto nan ta duna e parlamentario razon, cu no tabatin un base pa yega na un acuerdo.
Di otro banda, e parlamentario lo mester propone di su banda amienda den e ley cu ta al caso y sensato, sino e ta perde credibilidad si no mira nada di su banda. Esaki tumando na cuenta si cu parti di e critica cu el a trece dilanti ta cu e ley ta keda mancaron pasobra ta reglando asunto eyden cu ta rekeri creacion di antemano di e leynan cu mester sirbi como cuadro general pa e ley specifico aki. Esey ta berdad pero lo no ta e prome ley mancaron cu nos a yega di haya. Mester tene na cuenta cu den e mundo di ‘realpolitik’ y sigur den un coalicion, no tin tanto tempo pa perde cu mehora ley, asina en todo caso ta parce e pensamento den e partido. Tempo ta cuminsa preta y mester cumpli cu e partner pa e partner por cumpli. Nos tin e impresion cu e problemanan tabata mas na e nivel aki cu realmente tabatin un diferencia di opinion cuanto y ki cambio lo kier a haci den e ley di Serlimar.
Naturalmente e problemanan interno ta bin na luz publico na un momento cu realmente e coalicion no mester di esaki, y den e sentido aki lo ta haci dolor. Tin asunto bastante dificil pa atende na e momento aki, cu no ta solamente problema di e gabinete, sino di e ciudadano tambe. Otro siman caba tin otro encuentro na nivel di Reino, pa continua cu e asuntonan cu a keda pendiente, esta e instruccion pa loke ta cambio den presupuesto 2019, y e pregunta con ta bay duna continuacion na e supervision financiero. Algun siman atras nos prome ministro a declara den rueda di prensa cu lo ta trahando cu Hulanda pa logra hinca e supervision den un ley local, pero no a tende nada mas. Aki un siman di tur manera nos lo sa mas.
Simultaneamente nos tin e problema di indexering, unda e sindicatonan ta parce di ta preparando pa midi forsa. Esey lo ta e direccion den cual e asunto ta bay, pasobra gobierno no tin nada di duna actualmente. Si di berdad a logra haya un base solido pa presupuesto 2020, cumpliendo cu e normanan estableci den e acuerdo cu Hulanda, esey riba su mes ta un logro grandi, y lo ta logico tambe cu gobierno di ningun manera lo bay desvia di esaki. Esey no ta brinda mucho perspectiva pa e sindicatonan logra algo, cu o sin accion. Ta bira tempo si pa nan cuminsa realisa cu nan ta e parti privilegia entre nos, cu indexering sigura caba te 2024. Tin 50.000 den sector priva cu no tin esey, anto nan mester bay paga esaki?
