WILLEMSTAD – Otro siman miembronan di Project Management Organization (PMO), lo biaha tanto pa Merca como Inglatera den dos diferente delegacion, esaki ta pa asina cuminsa papia cu partidonan cu a demostra interes den e refineria di Corsou. Esaki ta e prome grupo di interesadonan cu PMO lo bishita i hiba combersacion cu ne. Mescos lo haci cu tur otro partidonan cu ta mustra di tin e potencial pa ta un partner pa nos refineria.
Project Management Organization (PMO), ta encarga cu e buskeda pa un partner strategico pa Refineria Isla despues di 2019, nan lo cuminsa reuni cu potencial partnernan cu a mustra interes pa maneha, opera y modernisa e refineria unabes e contract actual termina.
E bishita di PMO na e diferente companianan ta bin despues cu RdK a manda inventarisa interes cerca alrededor di 50 compania te con leu nan tin interes den un contracto di mas aña pa maneha y opera Refineria Isla. Mientras cu ainda e reaccionnan ta drenta, PMO conforme su asina yama “roadmap” cu e ta cana pa yega na e partner strategico, ta cuminsa cu su buelta di bishita na e empresanan cu ya caba a demostra interes. Den esaki ta trata di atende e buskeda den un forma mas eficiente, pero tambe na forma . Ta spera cu pa fin di e luna aki por yega na un lista cortico di esunnan interesa.
Esunnan selecta lo keda invita pa bishita e instalacionnan di e refineria y haci un asina yama “Due Dilegence” den luna di mei y juni proximo. E companianan durante juli mester entrega un oferta. Durante di e bishitanan na e diferente companianan: lo sigui sondea tambe e interes pa un entrada mas trempan den operacion di nos refineria.
Pago di salario
RdK entretanto a sigui cu su esfuersonan, hunto cu e actual operado, Refineria Isla, pa na prome luga reanuda operacion di e refineria y na di dos luga, pero no menos importante, purba genera entrada pa pago di salario di empleadonan cu ta traha den Isla.
RdK, banda di esaki, ta inventarisando varios otro trayecto pa reanuda e proceso di refinamento. Ta importante subraya si cu suministro di crudo ta keda e factor mas determinante pa e refineria por draai atrobe. Bal enfatisa tambe cu ta Refineria Isla, como e operado, ta esun responsabel pa percura pa su crudo yega y keda refina of cu e ta cera un acuerdo cu tercer pa suministro di crudo y despacho di producto, asina yama “tolling deal.”
