E manifestacion contra abuso di mucho ayera no a trece hopi hende riba pia e biaha aki. E organisacion representa pa Lisette Gomes a entrega un manifiesto na Ministerio Publico, mustrando cu nan no ta mucho contento cu con nan ta actua den casonan di abuso.

Nan intencion tabata pa entrega e documento na e hefe mas halto di e ministerio aki, e procurador general, pero e no a presenta. Asina e vocero Ann Angela a tuma e manifiesto cu mas tanto ta boga pa e fiscalnan di e ministerio lo exigi castigonan mas halto.

“E castigonan abou cu fiscalnan ta pidi, e efecto cu esaki tin riba comunidad y riba e mucha principalmente ta un punto importante pa nos. Tambe e desconfiansa cu ta reina pa cu Ministerio Publico. Pueblo no tin confiansa cu nan lo pidi castigo suficiente halto pa asina castiga e criminalnan aki. Esta na añanan mas largo cu 1 of 2 aña awor.” Sr. Gomes ta bisa cu mesun carta lo entrega na minister di Husticia, cu ta e hefe di Ministerio Publico tambe. “Como cu Aruba a firma cierto tratadonan internacional y e fiscalnan pidiendo un castigo abou, nan no ta tende cuenta cu e derechonan di mucha. Nan ta trapando e derechonan aki tambe.”

E organisacion lo bati e bel na tur departamento asina e ta sigui bisa. “Pa keda pusha y asina haya oido y debido cambionan bin mas pronto posibel. Nos ta bay bek parlamento tambe pasobra na final di dia e cambionan mester bin for di eynan.” Seis aña pasa sra. Gomes a organisa un manifestacion tambe cu si a haya un acogida grandi. Nan a bay parlamento entre otro pa urgi nan pa bin cu cambionan den ley pa asina por yega na castigo mas halto.

E plan ta pa fin di maart tambe nan lo entrega e manifiesto na corte pa asina hala e atencion di e huesnan cu segun sra. Gomes, na final ta dicta e sentencianan. E ta spera cu mas pronto posibel nan ta tende awor algo di Ministerio Publico y preferiblemente pa nan sinta na mesa cu nan.

‘No mas promesa’
Un manifestante tambe ta enfatisa riba e castigonan. Pero tambe cu e pedofielnan condena mester haya ayudo automaticamente. “Pasobra tanto bal pa cera nan, tira nan den cel y ora nan sali nan ta bolbe haci mesun un cos atrobe.” E ta bisa cu mester bin un punto pa meld tambe, pa asina e muchanan victima haya ayudo mesora. “Y no cu algo a pasa cu e mucha y ora mayornan ta haya sa, nan ta hib’e hospital pero eynan no ta bay haci nada. Of bo mester bin bek mañan of despues di un siman y asina no tin prueba mas. Si no tin prueba no tin caso. Den cosnan asina nos kier cambionan. Y nos no kier mas promesa, pero wak cambio di berdad.”

Miembronan di partido di oposicion MEP tambe a presenta. Lider Evelyn Wever Croes a indica cu nan lo bin cu nan plan pa asina yega na e castigo mas halto.