Pa presidente d sindicato STA, Diego de Cuba e anuncio di e 100 trahadonan cu a haya inicialmente badge pa traha den e proceso di facilita e reapertura di e refineria ta bon pa economia, pero ta bon pa sa berdaderamente cuanto di e trahadonan aki ta hende local.
Sr. De Cuba tin cu bisa cu for di e grupo aki cu a haya badge, lamentablemente e por a ripara cu no tur ta hendenan local; y cu ‘vergrootglas’ bo tin cu busca e hendenan cu ta biba na Aruba, ya sea yiu di tera of descendientenan di hendenan cu ta biba riba e pais aki; y cu a logra haya trabou den Citgo. Pa e sindicalista esey ta di lamenta masha hopi mes. Pero banda di dje e ta compronde cu tin un grupo di 250 trahado cu ta biniendo for di Trinidad pa bin traha den e refineria na San Nicolas.
Trahadonan local
Di un banda e ta haya cu reapertura di refineria ta bon pa economia, pasobra entre otro e ta yuda San Nicolas cuminsa draai bek y ta trece bida den e districto aki, locual STA tabata anhela for di hopi tempo caba. Sinembargo e sindicato ta mira cu den e fase inicial di reapertura di e refineria ta e bon momento pa bin y introduci nos trahadonan local. P’esey e ta trece cu preocupacion dicon den e prome grupo aki cu a haya badge diabierna ultimo, nan no a pone nos propio hendenan traha den e refineria. Si ta pasobra cu nan no sa e trabou cu mester haci, nos por siña nan, el a laga sa.
Nos tin hendenan den e refineria cu tin añanan di experiencia den e tipo di trabou aki; y e no ta kere cu e no ta algo imposibel pa siña nos generacion di trahado nobo con pa haci e trabou aki. “Pa nos keda importa hendenan di afo, e no ta saludabel tampoco”, el a bisa. Ora cu bo ta importa trahadonan di afo, kiermen cu nos divisa tambe ta bay afo, pasobra e trahadonan aki mester manda placa afo pa nan hendenan den exterior. E ta nifica un escape di divisa asina grandi cu seguramente no ta saludabel pa nos pais. Si Banco Central di Aruba ta haci un investigacion cuanto e escape di divisa ta for di nos pais, e ta algo astronomico, asina sr De Cuba ta splica.
STA y refineria
Ya caba STA a wordo acerca pa un grupo di trahado cu ta interesa pa afilia na e sindicato aki. Actualmente tin otro sindicato IOWUA cu ta representa un parti di e trahadonan di ex Valero den e refineria. Pero e trahadonan cu a yega di acerca STA, a yega di expresa nan malcontento cu IOWUA y e proceso di traspaso cu a tuma luga. “Ami ta kere cu e trahadonan aki tabata merece un pakete pa nan bay over pa e otro compania, locual no a sosode”, el a bisa na Bon Dia Aruba. Tambe e trahadonan ta haya cu e tempo tabata hopi cortico riba nan pa asina nan por tuma un decision mas consciente si nan ta bay over si of no.
Sr. De Cuba ta kere cu e sindicato menciona mester por a negosha un pakete pa tur e trahadonan aki por a sali sikiera cu algo for di Valero pa nan por bay over den e compania nobo. “Pero esaki no a sosode; y esaki ta di lamenta masha hopi mes. Pasobra ta un biaha bo ta haya e oportunidad eynan pa haci esey.” Presidente di STA a bisa cu no mester nenga di otro banda cu ta bon cu e refineria a cuminsa draai; y esaki ta definitivamente un plus pa Aruba, ya cu a wordo evita cu full un refineria a bay perdi. Aunke e no ta den full su capacidad, e reapertura di e refineria –segun STA- ta bon pa nos economia nacional, pero muy specialmente pa San Nicolas. Ya cu e trahamento di hotel pariba, sindicalista De Cuba no ta wak’e factibel pasobra e tera ta hopi contamina y prome cu bo ta sanea e tera ey, e ta un trayecto largo di mas cu 20 aña.
