(AFP) – Chatbotnan di AI generativo cu por skirbi email y codigo di computer, traduci, organisa un biahe of bin cu ideanan pa regalo awo ta facilmente disponible, loke ta pone algun hende puntra si capacidad mental di ser humano por sufri pa falta di uso.

Un prompt (instruccion) simpel den idioma natural normalmente ta suficiente pa haya un contesta usable for di un servicio manera ChatGPT of Claude, cu e efectonan ya ta ser sinti den scolnan y universidadnan, na luganan di trabao for di oficina te sala di corte, y tambe den nos bida personal.

Estudionan cientifico reciente ta sugeri cu por tin consecuencianan dañino ora hende entrega tareanan cognitivo na AI.

Nan ta destaca memoria, toma di decision y pensamento critico como areanan particularmente na riesgo.

Un estudio Mericano-Britanico cu 1,222 persona, ainda bao di revision academico, a haya cu uso di instrumentonan di AI pa resolve ehercicionan di aritmetica of comprension di lectura a mehora desempeño di participantenan den corto plaso, pero a largo plaso a reduci nan resultado y nan disposicion pa sigui purba ora e instrumentonan no tabata disponible.

“E hayazgonan aki ta particularmente preocupante pasobra perseverancia ta fundamental pa adkiri habilidad y ta un di e elementonan mas fuerte di enseñansa a largo plaso,” e autornan a skirbi.

Capacidad di AI pa genera contestanan rapido pa tur tipo di pregunta “ta kita oportunidadnan di siña” for di usuarionan, segun Grace Liu, studiante di doctorado na Carnegie Mellon University y autor principal di e articulo.

“Loke ta haci AI particularmente preocupante ta cu e no ta un instrumento destina pa un solo tipo specifico di actividad. Ta algo cu por ser usa den practicamente cualkier actividad intelectual, di rasonamento of cognitivo.”

Adaptabilidad di e tecnologia pa diferente tipo di problema ta pon’e diferente for di olanan anterior di yudansa digital.

Calculator electronico, por ehempel, por a yuda usuarionan resolve som, pero a laga e metodo y proceso di rasonamento den man di ser humano.

Spaar Energia

Un estudio di MIT na 2025 a bira viral pa su hayazgo cu studiantenan cu a usa AI generativo pa skirbi ensayo a mustra menos capacidad di pensamento critico.

Otro investigacionnan a apunta den e mesun direccion, destacando loke a bira conoci como “cognitive offloading,” of hasta “rendicion cognitivo.”

“Ser humano tin un tendencia fuerte pa spaar energia,” Johann Chevalere, investigador den psicologia social y cognitivo na institucion publico Frances CNRS, a bisa.

“Den bida diario, nos hopi biaha ta usa strategianan cu ta hiba nos mas rapido na e punto principal, sin necesariamente tuma tempo pa studia profundamente e informacion cu nos mester procesa, pasobra esaki por costa hopi esfuerso cognitivo,” el a agrega.

Uso di AI generativo por fortalece e tendencia aki, Chevalere a bisa. “Si tin actividadnan cu bo nunca ta haci, e cerebro — cu ta funciona door di spaar energia — no lo haci e esfuerso pa mantene conexionnan cu no ta ser usa.”

Stimula Reflexion

Bao presion di criticonan, desaroyadornan di AI generativo a cuminsa incorpora funcionnan yama “Socratic” den nan modelonan, cu pa awo ta mayormente dirigi na studiantenan.

Den e modo aki, chatbotnan no ta simplemente duna e contesta, sino ta ofrece pista y haci pregunta pa stimula pensamento di usuario.

Ehempelnan ta inclui “study mode” den ChatGPT di OpenAI, of “guided learning” den Gemini di Google.

Gigante Mericano di software Microsoft a bisa na AFP cu a incorpora advertencianan tocante riesgo di erornan den su modelonan Copilot.

E AI tambe ta recorda usuarionan pa verifica e informacion cu e ta duna, como un di varios medida diseña pa mantene nan activamente y criticamente envolvi cu su contestanan. “E riesgo di ‘excessive cognitive offloading’ ta real, specialmente si AI ta usa pa automatisa tareanan cu tambe ta valioso pa desaroya habilidadnan,” Microsoft a bisa, agregando cu usuarionan mester ser entrena pa usa e instrumentonan corectamente.

Pa awo, falta estudio grandi y a largo plaso pa usa e impacto real di e tecnologia nobo aki riba cerebro humano, investigadornan ta di acuerdo.

Te ora cu nan ta disponible, “ta depende di nos pa usa AI na un manera inteligente,” Chevalere a bisa.

“Nos lo adapta na e revolucion tecnologico aki mescos cu nos a adapta na esnan anterior.”