Cuerpo di Polis di Aruba a informa cu un dama a ser atraca y hinca cu cuchiu dialuna ultimo den oranan di anochi den area di Eagle Beach.
Den e comunicado pa prensa, Polis a señala cu dialuna anochi pa mas o menos 11:58pm central di polis a haya notificacion cu un señora lo a ser atraca y hinca na altura di Paradise Beach Villas na Eagle Beach, na unda a despacha e patruya na e sitio y como tambe ambulance.
Ora patruya a yega na e sitio ta topa cu e victima na unda e ta declara cu e tabata train (core) y na un dado momento un homber lo a acerC’e cu un cuchiu y a atraC’e, den esey, el a purba bringa cu e atracado y na un dado momento e atracado lo a hinC’e. E sospechoso tabata bisti full na preto segun a informa, despues e lo a core bay direccion noord y probablemente a huy den un auto color shinishi.
E atracado a logra bay cu su celular, ora ambulance a yega na e sitio a duna e victima asistencia medico y despues a transport’e pa hospital.
Atraco Team a presenta na e sitio como tambe polis tecnico y na unda a sigui cu e investigacion. Departamento di slachtoffershulp tambe a presenta pa asisti e victima.
Cuerpo Policial ta haci un apelacion pa esnan cu por a wak algo of sa algo pa yama e tiplijn di polis cu ta 11141, e yamada ta keda anonimo.
Riba medionan social por a mira diferente reaccion di usuarionan indicando cu “Aruba no ta e mesun Aruba di antes pa bay core den oranan laat di anochi y tampoco su so.” Un usuario a skirbi dunando su opinion riba e sucedido aki.
