Manera Bon Dia ya a anuncia awe mainta, polis a saca un relato policial di e persona perdi den caso di e auto cu curpa kima na Franse Pas. E ta trata Alex Rojas-Paz (37), perdi desde 31 di december.
Den e comunicado polis ta bisa cu: “Prome cu e preguntanan logico bin e team di investigacion kier bisa adelanta cu nan no por link e persona aki ainda na e caso di e curpa haya kima den auto na Franse Pas. E caso ey ainda ta bou investigacion en espera di e resultadonan di e laboratorio forensico di Hulanda.”
E caso ta relata
Sinembargo Bon Dia tin informacion confirma cu e persona perdi ta e doño di e auto kima. E identidad di e curpa haya den e bahul no ta confirma ainda.
Alex Rojas-Paz su ocupacion ta bendendo. Haltura 1.75m , postura delega, bandi su boca e tin un moedervlek. E ta papia Papiamento y Spaño. Ultimo e tabatin bisti un polo shirt preto, short bermuda berde color scur y keds preto. Ultimo su famia a mir’e riba 30 december 23:30 na Noord 44-C
