Polis actuando structuralmente contra ley

Polis na diferente warda structuralmente no ta tuma denuncia, algo cu ta contra ley. Esaki ta locual Bon Dia Aruba den transcurso di varios aña ta señalando.  Ta trata di casonan unda ciudadanonan ta purbando di haci denuncia contra echonan castigabel pisa, manera abuso sexual, maltrato, brandstichting, intento di homicidio.

Un caso recien ta trata di un automobilista cu den un pickup a manda su auto riba hende durante e Sprint Triathlon (7 mei), treciendo nan y deportistanan den peliger, asina e testigonan ta comenta.
Ora e secretario di e organisacion Aruba Triathlon Association Glenda Croes  kier a entrega un keho na warda di polis na Shaba. Sinembargo recherche a manda cas sin tuma su denuncia. “Nan a bisa cu mi no por duna keho pasobra nada a haya daño.” Segun sra. Croes e recherche a bisa cu solamente esun cu mester a hala pa e auto no a pasa over di dje, por entrega keho.

Sinembargo segun investigacion di Bon Dia Aruba e chauffeur a uza su pickup como arma y tur persona cu tabata testigo sea sinti su mes menasa, por haci un denuncia. Esaki ta un echo castigabel como cu e persona ta sospecha di intento di homicidio.

Banda di esaki e ta na polis pa investiga e caso, hasta si no tin daño of victima. Pero nan no por nenga un ciudadano pa haci aangifte. Esaki ta para cla den e Wetboek van Strafvordering den e di dos seccion Aangiften en klachten. Por ehempel den articulo 199 ta para: Tur cu tin informacion riba un echo castigabel, por entrega denuncia.  E articulo 198 hasta ta papia cu e ta obligatorio pa haci aangifte na momento cu ta trata di cierto echonan cu ta trece bida den peliger.

Articulo 201
Pero e articulo mas importante den e casonan aki, ta 201 incision 4: “Tot het ontvangen van de aangiften, (…)  zijn de opsporingsambtenaren (…) verplicht.” Pues polis ta obliga pa tuma e denuncianan di cuidadonan. Nan no por nenga nan, segun e ley aki.

Casonan
Pero manera Bon Dia Aruba a menciona, polis ta haci esaki structuralmente. E casonan cu nos sa di dje ta trata di ciudadanonan cu kier a haci aangifte na wardanan di polis na St. Cruz, Shaba y San Nicolas. Esun di abuso sexual tabata trata e caso di mas cu 6 aña pasa di Lisette Gomes unda e kier a entrega denuncia di abuso sexual di su dos muchanan pero warda di St. Cruz a mand’e cas bek pa bin dialuna pasobra no tabata un recherche cu por a atende su caso. Mientrastanto el a indica cu tabatin prueba riba e curpanan di su muchanan cu nan por a colecta.

E caso di brandstichting ta trata di un ciudadano cu a graba un homber riba video pega candela net pafo di cura di su cas y unda despues brandweer mester a paga esaki. Finalmente e cura no a haya daño, pero e habitante kier entrega keho pasobra por a mira hopi cla riba e grabacion cu e homber a pega e candela intencionalmente y pa motibo cu e bisindario tabatin molester di candelanan di mondi pa basta tempo. Sinembargo e polis a nenga di tuma e keho pasobra ‘e candela no a haci daño na su propiedad’.

Un otro caso tabata trata di Gilbert van Veen na mei 2016 unda e kier a entrega un keho na warda di Shaba pa maltrato pero a wordo nenga. Nan mester pidi asistencia di fiscal pa por entrega keho contra e persona cu a drenta e cas di sr. Van Veen y a atake, segun su abogado.

Un otro caso ta trata di e famia cu ta luchando contra e dump ilegal di asbest riba tereno di refineria. Nan a purba di entrega keho na warda di San Nicolas pero hasta e hefe di warda suplente a manda nan cas. Despues di dos dia nan a logra di haci denuncia pero solamente despues un periodista a hala atencion di un fiscal, cu a duna ordo na polis di San Nicolas pa tuma e keho.

Cuerpo y OM ta na haltura
Desde mei aña pasa Bon Dia Aruba ta purbando di haya un entrevista cu e alto comisario riba e asunto aki. Sinembargo y despues di varios promesanan di parti di e alto comisario Dolfi Richarson, esaki no a tuma luga ainda. Bon Dia Aruba kier sa di Cuerpo Policial dicon polisnan ta actua contra ley structuralmente. Y si por ehempel ta falta educacion.

Nos tambe kier combersa cu alto comisario riba su yamada haci na september aña pasa na comunidad pa bin entrega keho. Bon Dia Aruba kier sa con e ta mira esaki den contexto cu polis ta nenga denuncia di ciudadanonan.

Esaki tabata su comentario aña pasa: “Tin mas keho denuncia riba red social cu tin den nos sistema y esey ta preocupante. Pa dos motibo, pasobra asina nos no por investiga pa yega na e sospechosonan y tampoco nos por confirma si berdad un semehante delito a tuma luga.”

Tambe el a urgi: “Corda cu si bo yama polis y denuncia e caso, tin chens grandi cu nos ta gara e ladronnan. Pero si bo keda sin yama y sin haci denuncia, bo por ta sigur cu lo no gara e ladronnan y nan lo sigui comete mas crimen y kisas ripiti e mesun acto criminal cu bo mes”.

Nos tambe a trece e topico di denuncia dilanti durante un encuentro cu e procurador general (PG) nobo e tempo ey (october aña pasa). E hefe di Ministerio Publico aki, Alexander van Dam, a priminti na e momento ey cu e lo investiga esaki. Despues di un par di luna nos a purba di haya un entrevista pa mira con leu nan ta. Te awendia tampoco a logra di haya un cita.

Importancia di denuncia
Entrega denuncia no ta nifica automaticamente cu husticia ta bay persigui e caso. Esaki ta depende di e investigacion di polis y e pruebanan cu nan por haya. A base di esaki Ministerio Publico (OM) ta tuma un decision si lo persigui of no. Den e caso cu OM no lo persigui, e ciudadano ainda tin e derecho pa bay Corte Superior pa pidi hues pa duna ordo na OM pa haci mas investigacion y asina persigui e caso.

You May Also Like

image.jpeg

Dos atraco ayera nochi

E high season di criminalidad ta sigui cu dos atraco riba mesun anochi. Uno ...

‘Situacion explosivo no por soluciona cu pildo so’

  Basa riba diferente publicacionnan ultimamente en cuanto ta salud mental, segun psicologo Dimitri ...

Brasil den careda pa stop sarampi procedente di Venezuela

Profesionalnan di salud Brasileño a haci un movecion pa purba di controla un brote ...

download.jpg

A detene sospechoso cu ta atraca prostitutanan

Pa algun siman caba e ekipo di recherchenan encarga cu investigacion di casonan di ...

Gobierno e siman aki: den spera di ley adapta pa parkeer

E siman aki gobierno ta spera di por wak un concepto di e ley ...