Polis cu a comete abuso sexual ta haya 4 aña di castigo

Fiscal a pidi 3 aña y mey di prizon contra e polis E.R.B. acusa di viola un ciudadano riba 10 di november 2016. Awe 30 di maart 2017 hues a tuma su decision.
Agente policial E.R.B. acusa di abuso sexual, a haya 4 aña incondicional, kitando e tempo cu el a pasa den detencion.  Segun Ministerio Publico, hues no a kere su storia.  Tambe nan acusa e polis B. di malversa obhetonan: un chin-up y dos klop, den e periodo di prome di januari 2009 te 16 di november 2016. Y di ilegalmente haci doño di 60 bala y un klop.

E sospechoso B. na uniform di polis a duna e victima riba e fecha menciona ordo pa mustra su paspoort y pa subi den auto di polis. Segun fiscal, B. a bisa e señora cu e ta hib’e cera. Sinembargo el a hiba e victima na un luga leu, indicando varios biaha cu e ta un polis y menasa cu arma. Asina el a haci uzo di e desigualdad di poder cu a surgi como resultado di e situacion, segun fiscal.

Defensa
Den su defensa B. ta bisa cu el a bay e adres unda tin prostitutanan y a acerca uno. E polis a puntr’e si e ta disponibel, invit’e pa dal un ronchi y bay tene relacion sexual cu ne. El a haci sex boluntario, segun B. y drop e persona bek. “E no a paga ni tabata tin ningun intencion pa paga pasobra e muhe ni ta di su smaak”, asina su defensa a indica.

Sinembargo e victima no ta un prostituta, segun fiscal. E polis a bin na e cas, exigi pa e lanta para y controla su paspoort. E dama a bisa cu e polis a pidi pa e bin warda pa controla si su papelnan ta na ordo.  El a subi patras di auto di polis pero nan no a bay warda. E polis sospechoso a hib’e n a un sitio aleha pa despues forsa e persona pa haci acto sexual y tambe el a viola e victima. Esaki a sosode dia 10 di november, e keho a wordo entrega e siguiente dia.

Otro intento
E caso no ta keda te eynan. Dia 15 di november e polis a bolbe presenta na e mesun cas bou pretexto di controla e paspoort atrobe. E biaha aki di un otro muhe. Pero finalmente husticia a detene e polis.

Daña nomber di KPA
“E polis a crea un situacion di humiliacion, miedo y insulto pa e victima. El a wordo viola pa un polis, un funcionaro cu normalmente bo ta bay cerca di dje pa ayudo y di e manera ey e sospechoso a haci daño na confiansa, bon nomber y integridad di KPA. El a probablemente kere cu e persona no lo entrega keho pasobra e ta un prostituta anto lo tin miedo”, asina e fiscal a trece dilanti den corte.

E ta sigui bisa cu posiblemente tin un ‘modus operandi  pasobra el a bolbe dia 15 y na september tambe e tabata eynan’. “Pakico dus e tabata bay cada biaha na e cas specifico aki? El a bisa den interogacion cu ta pasobra e mester controla riba prostitucion ilegal, pero nunca el a traha ni un proces-verbaal of rapport tocante esaki.”

 

 

You May Also Like

Auto a hit & run palo di luz den Papilon

Dialuna anochi bario di Papilon a keda sin coriente esaki tabata debi cu un ...

Atraco riba famia comerciante den nan cas

Awe nochi polis ta informa cu un atraco arma a tuma luga den un ...

Auto a bolter na Santa Martha y tres persona a resulta herida

Diahuebs mainta trempan riba e caminda di Santa Martha caminda muha a causa cu ...

Investigacion andando pa determina causa di morto di baby ayera

Ministerio Publico ta hibando un investigacion dilanti pa haya sa causa di morto di ...

Bringamento na Epb Hato

Dialuna durante oranan di merdia varios unidad policial a presenta na EPB Hato pa ...

Autoridadnan riba accion despues di dos detencion awe mainta

Awe mainta 11:57 na un apartamento na beaujonstraat, un atraco a tuma lugar segun ...