(BioBio).- Un grupo di cinco Chileno a keda deteni na Argentina, despues cu nan a ser sorprendi ora cu nan tabata purba roba un banco den e bario Floresta, na ciudad di Buenos Aires.
Segun corant El Clarin di Argentina, e grupo di suheto a ser sorprendi den un banco, sin ningun arma di candela y cu tur alarma desactiva, pasobra prome cu nan a drenta den e lugar nan a kita e electricidad di henter e edificio.
Pero pa mala suerte, un grupo di polis tabata vigilando den e zona ey y un di nan a mira cu e porta di e banco tabata habri y pa tal motibo nan a drenta e lugar y asina nan a haya e grupo di criminal ora cu nan tabata purba di horta eyden.
Ora cu nan a keda deteni, ningun di nan a mustra resistencia contra e accion di polis, y nan a bisa cu nan a drenta na e lugar kibrando un bentana y blinds di metal.
“Evidentemente nan tabata traha par di minuut so pasobra e porta tabata daña caba, pero nan no a logra drenta na e tesoro,” polis a splica.
Polis a declara cu den e grupo di suheto deteni no tin menor di edad, y cu e grupo deteni tin entre 30 y 40 aña di edad.
E prome investigacion ta bisa cu e grupo di Chileno tabatin permiso di residencia na Argentina, y cu tur di nan a yega den ultimo tres luna na e pais.
