(BBC)—Polis di Escocia ta haciendo investigacion activo tocante actividadnan di Andrew Mountbatten-Windsor, Jeffrey Epstein y Ghislaine Maxwell durante nan estadia na kasteel Balmoral.
Daily Express a reporta cu e investigacion ta relaciona cu acusacionnan cu muhenan a ser transporta pa e residencia real na Aberdeenshire como parti di trafico di hende.
Epstein, un delincuente sexual cu a muri na 2019, y Maxwell, cu a keda condena na prison na 2022 pa trafico sexual, segun informacionnan a bishita e kasteel hunto cu Mountbatten-Windsor, kende anteriormente a nenga cu el a comete cualkier acto incorecto.
Polis di Escocia a declara cu e investigacionnan ta “den un fase masha preliminar” y cu no lo ta apropia pa duna mas comentario.
A tuma contacto cu representantenan di Mountbatten-Windsor pa pidi nan comentario.
Tradicionalmente, e famia Real ta pasa verano na Balmoral, unda Reina Elizabeth II a muri na 2022.
Ora a puntra un vocero di Polis di Escocia tocante e rapport di Daily Express, el a declara: “Nos a ricibi informacion y investigacionnan activo ta andando, pero esakinan ta den un fase masha preliminar.
“Tur investigacion ta basa riba evidencia, cu e necesidadnan di e victimanan sobreviviente como punto central di e investigacionnan.
“Nos nunca lo confirma detayenan di investigacionnan cu ainda ta andando y no lo ta apropia pa duna mas comentario.”
Na februari, e cuerpo policial a declara cu e kier a “papia cu cualkier hende cu tin informacion” tocante uzo di aeropuerto di Edinburgh pa e jet priva di Epstein.
Na e momento ey, e polisnan a declara cu nan no a ricibi ningun rapport of keho relaciona cu e biahe.
Registronan di vuelo ta mustra cu Mountbatten-Windsor y Maxwell a bula di Luton pa Edinburgh abordo e jet priva di Epstein, hunto cu dos otro pasahero, dia 1 di september 2006.
Fiscalnan Mericano tambe a publica un imagen cu aparentemente ta mustra e financiero desacredita Epstein y e ex-figura social Maxwell na Balmoral, durante e huicio di Maxwell pa trafico sexual.
Ta kere cu a saca e potret na 1999, ora segun rapportnan Mountbatten-Windsor a invita e pareha pa keda na e kasteel.
Segun rapportnan, Epstein y Maxwell tabata bishitantenan regular di residencianan Real durante fin di añanan 1990 y comienso di añanan 2000.
Aña pasa, Departamento di Husticia di Merca a publica e asina yama archivonan di Epstein.
Entre e documentonan tabatin un e-mail di un persona identifica como “A” dirigi na Maxwell, den cual e remitente a bisa cu e tabata na Balmoral y a pidi “amigonan nobo inapropia”.
E mensahe, manda na Maxwell dia 16 di augustus 2001, ta cuminsa: “Mi ta aki na campamento di verano di Balmoral pa Famia Real.”
Mas dilanti den e e-mail, e remitente ta puntra: “Con LA ta? Bo a haya algun amigo nobo inapropia pa mi?” prome cu termina e mensahe cu “nos ta wak otro, A xxx”.
Jeffrey Epstein tabatin 66 aña ora el a kita su mes bida na 2019 den un prison Mericano, mientras e tabata warda pa su huicio pa acusacionnan di trafico sexual.
Maxwell, di 60 aña, a keda condena na 20 aña di prison na 2022 pa su participacion den reclutamento di mucha muhe pa Epstein.
Na october aña pasa, a confirma cu Andrew a perde su titulo di “prins” y cu e mester a bandona su mansion Royal Lodge na Windsor.
Na februari, el a keda aresta bou sospecha di mal conducta den funcion publico, despues cu informacion nobo a sali for di e archivonan di Epstein na Merca. Mas despues el a keda libera.
Na comienso di e luna aki, a sali na cla cu Andrew ta tumando accion legal contra Polis di Thames Valley tocante ordennan di buskeda cu a ser emiti prome cu su aresto.
Mountbatten-Windsor constantemente a nenga cu el a comete cualkier acto incorecto relaciona cu su asociacion cu Epstein.
Ora a puntra prome minister di Escocia, John Swinney, tocante e rapportnan mas reciente, el a declara: “Mi ta compronde e seriedad di e puntonan cu a menciona y e preocupacion cu a expresa.
“Esaki ta un asunto operacional cu Polis di Escocia mester investiga completamente y minuciosamente, y mi tin pleno confianza cu esey ta exactamente kico Polis di Escocia lo haci.”
Prome minister Andy Burnham a declara cu e no kier a comenta riba e investigacionnan policial, cu “mester ser conduci di manera independiente”.
Potretnan di AFP.
