Polis di henter Reino Hulandes ta buscando Robertico Inesia

Den e programa Hulandes Opsporing Verzocht cu a tuma luga diamars ultimo, polis di Den Haag a pidi atencion pa buskeda di Robertico Inesia. 

 

Den un tiramento cu a tuma luga dilanti un café den Herenstraat na Den Haag riba diasabra 11 di juli 2015, dos homber a ricibi bala. A transporta un di e victimanan pa hospital na tempo. E otro victima a fayece na e sitio. Robertico Ramon Maria Inesia ta e sospechoso den e tiramento y su nomber di cariño ta Tico, naci riba 20 di april 1981. E ta midi 1.82 meter y tin tatuahenan remarcabel riba su brasanan. E ta procedente di Corsou y ta posibel cu ainda e tin su contactonan eynan of otro islanan den Caribe Hulandes. Robertico a disparce for di dia di e incidente.

 

Cuerpo Policial di Hulanda a solicita asistencia di e cuerponan ruman den Reino Hulandes pa acerca nan comunidadnan cu e pregunta cu si nan por a mira of papia cu Robertico Inesia despues di 11 di juli 2015? Tambe si nan lo por sa na unda Robertico ta permanece actualmente?

A pone un recompensa halto na disposicion pa esun cu por duna informacion of indicacionnan cu por yega na detencion di e sospechoso fugitivo. Bo por comparti e informacion Nationale Opsporingstiplijn 0800-6070 of tambe por bel e tipline di Cuerpo Policial di Aruba na 111-41.