SEPPA: Servicio publico di dump Parkietenbos mester keda den man di pueblo

SEPPA Dump Comunicado JO (3).JPG
Habriendo e siman aki, empleadonan di Serlimar a mustra gobierno nan reaccion riba e declaracion cu a sali den prensa cu entrante 1 januari 2017 ta bay cera Landfill Parkietebos. Segun Sindicato di Empleadonan Publico y Priva (SEPPA), ta hopi importante pa e servicio publico di e dump aki ta keda den man di pueblo sin haci negoshi cu e luga. 
 
Prome cu esaki, ya rumornan tabata circula riba e tema aki pero e declaracion di gobierno a mustra mas fuerte e direccion cu gobierno kier tuma pa cu e dump. Intentonan di SEPPA pa haya reunion for di gobierno tampoco a duna resultado, pues dialuna mainta trahadonan a aparece dilanti Bestuurskantoor pa esaki.  
 
Competencia den negoshi
E intencion cu gobierno pa  sanea e dump, e presion cu tin pa esaki, ta algo tur hende ta wak segun SEPPA cu ta bisa: “Con ta haci esaki y unda trahadonan ta para ta contestanan cu mester wordo duna na trahadonan. Gobierno a informa SEPPA  cu e intencion ta pa den januari baha e cantidad di actividadnan riba Parkietenbos. Esaki ta contrario na loke a sali den prensa cu pa 1 januari 2017 ta cera e dump, lagando pueblo mes cu e pregunta: kico ta haci cu e sushinan di tur dia y e trahadonan mes kico ta para cu trabao y pan di cada dia.” 
 
Gobierno ta bin cu luga nobo pa warda e sushinan y cu tambe ta bay over na cera e buraconan.   Pues e trabaonan lo wordo haci pa trahadonan di dump mes bao supervision di  trahadonan di Serlimar. Ta pa motibo cu nan ta ocupa pa sanea e dump, ta pa e motibo ey lo a scoge pa e sushi wordo hiba na otro caminda cual akinan tambe ta lanta e pregunta segun SEPPA:  pakico lo bo hiba bo servicio netamente na esun cu awe ainda ta bo competencia den negoshi. Pa cuanto tempo no ta mucho cla tampoco, paso asina por cuminsa kita trabao di un compania di pueblo manera Serlimar y ta laga pueblo custumbra cu e idea segun SEPPA pa mañan kita esaki definitivamente. Segun SEPPA,  ningun comerciante ta bay haci inversionnan grandi y nos ta papiando di miyones djis pa un rato anto djis pa yuda. Al contrario, e kier su placa bek pasobra mas ganashi y mas largo e keda gana, mas miho, asina e sindicato a declara na Bon Dia Aruba. 
 
Pues e comerciante/compania/inversionista  su unico meta ta pa traha placa y haci ganashi pa a lo menos saca su ‘return of investment’, segun SEPPA. Sigur no un acuerdo di 1 aña ni 2, pero sigur e lo desea acuerdonan pa largo. Esaki ta basico den mundo di negoshi anto segun SEPPA ” negoshi ta keda negoshi, nada ta cambia akinan.” Pues,  e ta bon cla pa SEPPA y trahadonan di Serlimar cu algo tin anto nan algun informacion cu negociacionnan ta andando.
 
Garantia di trabao y entrada
Aunke  en principio e problema di dump por mustra cu e ta afecta trahadonan na e luga solamente, segun SEPPA, nos mester compronde cu den caso cu ta kita of bende dump for di Serlimar na otro compania, cu esaki tin consecuencia pa Serlimar completo. Den e situacion cu nos ta na e momentonan aki, gobierno ta garantisa trabao y entrada cu tur condicionnan laboral.
SEPPA ta bisa: “Nos ta spera cu gobierno ta comprende si, cu ora nos ta papia di trabao nos ta referi na e trabaonan normal na dump y ora nos ta papia di entrada, nos ta referi cu ningun trahado no ta bay atras den nan entrada di luna. Anto pa loke ta trata nan condicion laboral, cu trahadonan ta sigui cana den nan carera normal, sin bin cu storianan bruha, manera cu na Serlimar mes a yega di purba di bin cu ne.” Pa awo SEPPA ta wanta gobierno na su posicion, esta cu niun compania ni persona no ta bay cumpra Serlimar, tampoco ta bay tuma trahadonan di Serlimar over pasobra dump ta keda di Serlimar.
SEPPA ta lamenta cu te awo por a sinta cu nan pa atende cu nan riba e asunto aki. Segun e sindicato ta bon cla cu mester a forsa un reunion y forsa gobierno pa duna cuenta na trahadonan pa trece claridad riba nan pan di tur dia pero tambe na nos cu ta forma parti di comunidad riba supuesto negociacionnan cu ta tumando luga riba loke pa nos ta  “patrimonio di pueblo”.

You May Also Like

lucha contra lionfish 2.jpg

Otro aña lo introduci trampa contra Lionfish

Apesar cu actividad ta tumando luga pa contraresta e efecto desbastado di Lionfish cerca ...

Maltrato fisico por pasa cu tur persona

Durante un conferencia di prensa Mervin Wyatt-Ras a trece padilanti cu e ta condena ...

Mas poder pa Banco Central por controla agencia cu ta transferi placa

Siman pasa parlamento a aproba unanimamente e ley cu ta duna Banco Central di ...

sipirito di pasco salud.png

Bo no tin gana di Pasco? Bo mente por ta responsabel

Esaki ta e temporada pa ta contento, wel pa mayoria di persona. Pa otronan, ...

Manager di siguridad ta bisa Tesla a spiona su empleadonan

E di dos ex- empleado di Tesla a entrega un denuncia oficial cu e ...