(NLTimes) –Polis na Rotterdam a los varios tiro di advertencia durante disturbionan na Coolsingel, un caminda principal den centro di e ciudad. Tambe a manda un team di riot commando na restaura orden, segun cuerpo di polis a bisa riba rednan social.
No tabata inmediatamente cla si tabatin algun herido, maske tabatin reportahenan cu a ataca un periodista riba caya. Noticiero Rijnmond a bisa cu a bati e periodista y a destrui su camara.
Tabatin un manifestacion contra restriccionnan di coronavirus den e area, cu cantidad di persona expresando preocupacion pa e sistema di pase di acceso 2G. Si ta implementa e sistema 2G, esey ta nifica cu solamente personanan cu a recupera di Covid-19 y esnan vacuna contra e malesa ta bay ta permiti den varios sitio, incluyendo bar y restaurantnan. Actualmente Hulanda ta usa e sistema 3G cu tambe ta duna pasenan di acceso na persona cu a test negativo pa coronavirus dentro di 24 ora di uso di e pase.
“Un manifestacion riba e Coolsingel a resulta den disturbio”, polis a bisa riba rednan social. “A cende candela na varios sitio, ta tirando klapchi, y polis a los varios tiro (di advertencia). Polis ta presente den gran cantidad y ta purbando di restaura orden.”
Durante e enfrentamentonan, a cende vehiculo di polis y otro vehiculonan na candela. Hende na e escena tambe a bisa cu a usa cañon di awa pa dispersa e multitud. Otro auto y van di polis y tambe a sufri daño.
Como resultado di e violencia, stacion central di trein na Rotterdam tambe a wordo cera. “Pa motibo di disturbio na Rotterdam, ningun trein por bay for of na Stacion Central di Rotterdam te proximo aviso”, NS a bisa riba Twitter. “Parcialmente pa motibo di e situacion na e ciudad, no ta usando busnan di reemplaso di servicio.” E servicio nacional di trein a bisa cu lo actualisa riba su canalnan di rednan social.
Tambe a cera varios parada di metro na Rotterdam, incluyendo esnan den Stacion Central, Beurs, Leuvehaven y Eendrachtsplein. E borchinan digital riba caminda A20 y camindanan local tambe a pidi motoristanan evita centro di Rotterdam, segun ANP a reporta.
