Gai cora a canta diasabra marduga den Dividivistraat na Dakota. Un patruya di Oranjestad pasando den e bario unda nan tabata haya holor di huma un rato prome, a bolbe haya holor ora nan tabata bayendo direccion Playa. Esaki a haci cu nan a bira bay bek pa wak ta di unda e holor ta bin.
Pasando den Dadelstraat e holor a bira mas fuerte y den Dividivistraat e oficialnan ta topa cu candela grandi na un cas. E oficialnan a baha di biaha pidiendo resfuerso di mas colega y brandweer cu urgencia. E oficialnan a bay wak si tin hende paden y aki e tres oficialnan a drenta den tur e huma pa wak si tin hende pega den cas.
Parti patras di e cas nan ta bin topa cu un hende homber ta lucha cu un anciana riba rolstoel. E oficial den tur e huma a logra di saca e anciana bay cune te otro banda di caminda pa e no sigui inhala e huma y asina a pidi ambulans presenta cu urgencia. Dos truck di brandweer a presenta pa domina e candela rapidamente.
Polisnan a rescata te hasta cachonan chikito cu tabata pega den e cas. Personal di Elmar a presenta pa wak si mester kita coriente na e cas. A notifica recherche y departamento forensico di e caso aki.
