Polis Zebeda no a cumpli debidamente cu bestelling pa GNC

Despues cu e cuerpo policial Aruba (KPA) a informa pa medio di un comunicado, cu fei 9 di augustus ultimo y pa un periodo di 6 luna, e funcionario di polis Errol Zebeda no mag di drenta na niun edificio, autonan y tereno di KPA, ayera minister di Husticia, Andin Bikker (POR) a duna prensa mas informacion tocante e decision aki.

El a bisa cu e prohibicion aki contra sr. Zebeda ta basa riba e echo cu su persona a participa di un pedido di material haci un par di luna caba pa Guarda Nos Costa (GNC). E mandatario a laga sa cu ora el a bira minister, un aspecto di su maneho tin di haber riba asunto di material pa cuerpo uniforma. Minister Bikker a indica cu urgentemente ora el a bira minister, asunto di compra di material ta uno cu e ta bay direct parlamento, pa pidi aprobacion pa su ministerio por haya fondonan pa nan por percura pa tur material, ya sea pa personal di GNC, KPA y KIA, etc…

Pero den e caso di sr. Zebeda, e mandatario a referi specificamente na material cu Guarda Nos Costa (GNC) tin mester urgentemente. Minister Bikker a indica cu e funcionario policial aki a pretende cu e bestelling a tuma luga, pero no tabata asina. “Pero a bin resulta cu e no a haci e pedido akinan.” Ademas pa colmo sr. Zebeda a cuminsa manda cierto mensahenan na e compania na cual e material aki mester wordo pidi, pa e ‘compania bin yud’e gaña cu el a haci pedidonan’, segun e minister. Sr. Zebeda su funcion tabata Hoofd Divisie Bedrijfsvoering di KPA y ainda Guarda Nos Costa ta cay bou e dak di cuerpo policial.

E mandatario a expresa cu e comportacion aki ta algo cu nan no ta aprecia; y a base di esey a dicidi di dun’e un ‘toegangsontzegging’. Tambe minister Bikker a bisa cu el a wak otro informacion divulga den media, pero di su banda e ta sostene cu esaki ta e motibo pa cual a dicidi di duna un prohibicion temporal na sr. Zebeda, te ora un investigacion disciplinario ta tumando luga. Minister a agrega cu si e funcionario aki no ta di acuerdo cu e decision aki, e tin oportunidad pa bay corte, esaki conforme cu nos estado di derecho.

Loke el a relata –segun minister- ta loke a tuma rond di e decision aki. Aunke el a menciona cu tin otro incidentenan tambe pa loke ta trata formanan y procesonan cu mester wordo observa fei di nos ordenansa. El a splica cu ordenansa ta e base pa e maneho di finansa publico di pais Aruba; y con nan mester atende cu ne como minister. Tambe den cuadro di ordenansa e forma con e tipo di proceso aki a wordo haci ta lanta hopi pregunta, segun e mandatario. E ta haya cu e asunto relaciona cu e pedido di material di GNC di parti di sr. Zebeda, tabata ‘e ultimo druppel cu a laga e hemchi bay over’.

 

You May Also Like

Control di Higiena y siguridad a pone cu a cera luganan

Departamento di DOW, Salubridad Publico, Polis ta sigui cu nan controlnan. Durante control na ...

OM: A detene tramitadora den caso IBIS awe mainta

Un rato pasa vocero di Ministerio Publico (OM) a confirma na Bon Dia Aruba ...

Kpa detencion (NW).JPG

Persona a hoga despues di purba drenta Aruba na forma ilegal

Segun informe di polis, awe mainta pa 07.55 melding a drenta via Central di ...

Ta ser busca: Gabriela Zievinger kende ta perdi desde 10 di maart

Gabriela Zievinger tin 15 aña y ta naci 4 Januari 2002. E ta biba ...

Por poco auto a bolter den saliña na Rooi Frances

Chauffeur di un mitsubishi lancer a perde control cu e vehiculo riba e caminda ...

Bringamento formal entre companianan di watersports atrobe na Eagle

Un biaha mas bringamento formal entre dos compania di watersports diaranson den careda di ...