Home Editorial Pone enseñansa publico na distancia di politica

Pone enseñansa publico na distancia di politica

388

Un paso logico?

Nos ta keda den e dianan aki den e tema di tarea o funcion publico cu si of no mester ta bao di dirigencia directo di e mandatario concerni. Prome tabata e caso den corte di fundacion Lotto pa Deporte, unda hues a haya cu nombra hende di confiansa di e ministro encarga no ta motibo suficiente pa cambia directiva di un fundacion. Tambe pasobra a crea esaki mas aleha di  politica, pa concentra miho riba implementa loke ta na interes di e fundacion mes. Naturalmente cu e fundacion ta autonomo, no independiente, y mester duna su colaboracion sincero y leal pa implementa e maneho cu e mandatario nobo kier mira realisa. Ademas, si e mandatario nobo  no ta satisfecho cu e maneho hiba, e mester por expone su maneho nobo na e directiva. Segun cu esey no ta keda cumpli, ta surgi circunstancia cu ta hustifica cambio di directiva, pa logra e maneho desea. Henter e idea anto di dirigi como mandatario desde un cierto distancia ta basa riba dirigi cu maneho y strategia, y menos den mete cu e operacion diario.

Awor e caso di e mandatario encarga cu enseñansa, cu a anuncia cu e ta desea di hinca e tareanan di Dienst Publieke Scholen den un fundacion nobo, manera e mes ta declara, pa independisa e maneho di e scolnan publico y pa saca esaki for di man di politica. Cu esaki anto e idea lo ta pa limita e poder directo cu e ministro concerni tin den e maneho di e scolnan cu ta cay bao di DPS actualmente. Esaki no ta henteramente un sorpresa, pero interesante ta e motibo pa hacie. E mandatario ta declara cu e no ta haya cu e ministro, cualkier persona cu tin e puesto ey, mester ta metiendo henter ora directamente den e maneho di e scolnan. Goberna pues, manera bisa anteriormente, desde cierto distancia a base di maneho stipula, lagando profesional bon educa y cu e experiencia apropia, tuma rienda directo di e scolnan publico.

Si nos ta scucha bon, e ministro ta sincero di kier sigui e modelo aki pa e motibonan corecto. Un motibo valido  ta cu e ministro tin mas tempo pa atende otro asunto, tambe na nivel di maneho, y no di implementacion. Esey ta di aprecia, pasobra te awor ta mira cu e mandatario en general, no esun aki specificamente, ta demasiado meti den e nitty gritty di dirigencia diario.

De paso e mandatario a menciona tambe cu no ta tuma e paso aki pa autorisa, y esey nos por kere, pasobra e independisacion di un servicio asina en principio no ta trece un alivio di gasto di personal, ni di gastonan di operacion. Y como cu e fundacion lo pasa pa e sector subsidia, e gastonan total ta keda core pa responsabilidad di gobierno. Tambe por señala cu e creacion di e fundacion ta pone maneho di scol publico practicamente den mesun posicion cu e otro fundacionnan no gubernamental, loke ta crea un plataforma mas igual pa loke ta nan necesidadnan cu merece trato a base di igualdad. Esaki no ta un luho pasobra tin bastante diferencia ainda den disponibilidad di recurso, loke den e situacion nobo lo por ta  menos.

Asina por mira cu e decision aki no ta un stap ilogico. Loke ta keda ta e pregunta si den practica esaki ta bay funciona asina tambe, specificamente pa loke ta mantene e debido distancia y laga esunnan cu mester dirigi e entidad nobo haci nan trabao. Hopi lo depende di e estilo di goberna di e mandatario di e momento. Por ta cu e actual mandatario ta cumpli cabalmente cu su filosofia di mantene distancia,pero ta existi e posibilidad cu e siguiente mandatario ta haya cu e mester ta envolvi directamente den tur cos y ta busca manera pa hala cos pa su banda, y ta bolbe na e modelo anterior di goberna directamente, cu of sin fundacion memey. Ta esaki nos a mira pasa cu tur e empresanan estatal y fundacionnan, crea cu e meta bunita aki, pero unda e decision toch ta bin directamente di e ministro.

Di otro banda, tambe e publico mester custumbra cu no por bay apela mas  cerca e mandatario pa cualkier asunto, sino cu mester atende e asunto cu e dirigencia di e fundacion. Nos no ta bisa esaki pornada pasobra den un comunidad chikito e liñanan ta cortico y hopi asunto ta end up cerca e ministro di tur manera. Nos por a mira esey den un caso medico reciente unda ta envolve e ministro encarga, pero esey no ta cambia e hecho cu ta e director di AZV mester a tuma un decision, loke el a trece corectamente dilanti. Tin hopi mas caso asina, tambe di departamento cu ta cay directamente bao di un ministro, unda cierto asunto segun ley ta un decision pa e ambtenaar tuma, y no e ministro. Naturalmente ta recomendabel pa consulta cu otro pa e funcionario ta na altura di loke e ministro ta pensa, pero ainda ta esun cu ta tuma e decision final. Crea debido distancia no ta un lema so, e mester bira parti di cultura.