Home Regional Mexico: captura di lider importante di cartel Los Zetas

Mexico: captura di lider importante di cartel Los Zetas

362

(UnivisionNoticias) – Ciudad de Mexico – Agentenan di Marina Mexicano a detene diahuebs pasa na  colonia Roma, un di e barionan exclusivo y turistico di e capital,  José María Guizar, alias ‘Z43’, un di e presunto lidernan di e cartel di Los Zetas.

Renato Sales, comisionado di siguridad nacional di Mexico, a detaya ayera cu Z43, di nacionalidad Mexicano y Mericano, ta un di e 122 obhetivonan prioritario pa autoridadnan. Gobierno di Merca ta ofrece 5 miyon dollar pa su captura.

E persona aki tabata e lider di Los Zetas den centro y zuid oostdi Mexico y tabata controla trafico di droga desde Sur America y Centro America pa Merca. Ademas e tabata dedica na extorsion y secuestro den e region.

E detencion ta bin algun dia despues cu gobierno di Ciudad de Mexico y autoridadnan federal sigura cu e unico grupo relaciona cu crimen organisa cu tin,  ta opera den parti oriental di e capital.

E hefe di gobierno di Ciudad de Mexico, Miguel Angel Mancera, a nenga cu ta existi operacion di e cartelnan di narcotrafico mes den e ciudad. No obstante, a mira varios operativo cu ehercito y marina pa combati varios capo.

Analistanan di siguridad consulta pa Univision Noticias na juli di aña pasa asigura cu e sucesonan ta mustra e presencia di gruponan di crimen organisa cu mas poder di arma, mas control y proteccion.

“No solamente ta existi crimen organisa, sino cu e tin control den cierto partinan di e ciudad. No ta cartelnan grandi manera esunnan cu ta opera den otro parti di e pais, pero mester corda cu e caracter di narcotrafico a cambia den ultimo añanan: den cierto zonanan e organisacionnan ta mas chikito, cu structura mas horizontal y nan ta asocia na cu otro agrupacionnan pa benta di arma o droga”, Erubiel Tirado, experto den politica di droga y siguridad nacional, ta bisa.

E docente universitario Pablo Monsalvo a bisa cu semper tabatin presencia di cartelnan di narcotrafico den e capital Mexicano, mas cu tur cos pa e realidad comercial di e ciudad, unda tin banco, empresa y otro clase di inversion unda e capital ilicito por move. “Ta mas facil move placa aki (na Ciudad de Mexico) cu den un pueblo o cualkier otro provincia di e pais”, Monsalvo ta considera, cu ta agrega cu te awor e presencia di narcotrafico tabata silencioso y di profiel abao.