E metanan di desaroyo sostenibel pa 2030 di Nacionnan Uni ta menciona como e prome temanan: cero hamber, sin pobresa y bon salud y bienestar. E tres metanan aki ta intimamente liga na otro y di e forma aki ta miho pa discuti nan tambe. Pobresa y hamber, como expresion grave di pobresa, ta semper mas halto riba e lista di cos indeseabel cu mester elimina for di cara di mundo. Aunke esey ta obvio, no awor so pero pa siglos caba, no por bisa cu den e mundo moderno nos a avansa tanto cu esey. Hasta den e paisnan cu mayor prosperidad actualmente, e prosperidad aki no ta reparti na un manera equitativo. Por ehemplo, e pais supuestamente mas rico, miho bisa e pais di mas desaroyo economico, Estadonan Uni, ainda ta carga e peso di un pobresa considerabel. Sigur 30 miyon persona, loke ta alrededor di 10% di e poblacion, ta depende tur luna di ‘food stamps’ pa nan por yega na un minimo di alimentacion.

Cada aña por lamenta morto di diesmiles di persona na Merca cu den invierno no por afford tene nan hogar, si acaso nan tin uno, na un temperatura aceptabel. Nan no tin un sistema di seguro medico general, loke ta haci cu e mesun grupo grandi aki no por afford cuido medico aceptabel, pa no papia mes di enfermedad cronico grave, pa cual nan no por haya tratamento. Entre e paisnan desaroya mester conta, en todo caso pa loke ta e cuido medico, nos propio Aruba tambe. Otro pais prospero, manera Hulanda y e paisnan Nordico, ta luci faborabel anto compara cu Merca, pero tambe conoce pobresa a pesar di tur esfuerso y pretension di por elimina esaki completamente.

Si nos por conclui anto cu no tin ningun pais na mundo cu no conoce pobresa, nos por cuminsa pensa riba kico pobresa ta basa, cual ta e indicadornan di pobresa, o prosperidad. Nos tin e indicadornan di crecemento economico manera GDP (Gross Domestic Product), e total di beneficio economico acumula dentro di un pais, y e GDP per capita (pa persona), cu facilmente ta duna un imagen ekiboca. No ta pasobra e GDP pa persona den un pais ta halto, tur hende ta gosa di un entrada halto. Tin otro parametro pa indica den ki grado e situacion di entrada individual ta desvia di e promedio, manera e ‘Gini-coefficient’ cu na ‘0’ ta indica igualdad perfecto di tur entrada individual, y na ‘1’ ta marca desigualdad perfecto.

Pero tur e indicadornan ainda no ta duna nos un imagen real di loke ta tumando luga den un cierto pais, den cierto circunstancia. Pa haya sa esey, mester analisa e situacion di cerca mes. Pa cuminsa, no tin igualdad di criterio kico ta considera pobresa. Entre e situacion den e paisnan mas pober di mundo, unda un parti considerabel di e poblacion ta pasando hamber practicamente tur dia, ta totalmente un otro situacion cu esun di un mama cu tres yiu chikito den bijstand na Hulanda, cu tin un dak riba su cabes y ta logra paga mayoria di su gastonan. E no tin nada di luho, e no tin auto y si e tin suerte un bicicleta bieu, pero probablemente tin cuminda riba mesa tur dia. Estadisticamente ta considera e persona bibando bao di e limite di pobresa, pero e ta remotamente aleha di e situacion di un hende pober den un pais pober, cu apenas tin un shopo di carton, y cu no tin ningun entrada y no sa mainta si e dia ey e y su yiunan ta haya algo di come. Nos por conclui cu den cada pais mester defini kico segun nan criterio ta pobresa.

Awor, den nos caso nos a defini loke na Hulanda ta yama e ‘armoedegrens’? Esey ta un criterio mas estricto cu e asina yama ‘bestaansminimum’ calcula pa Oficina Central di Estadistica (CBS). Na 2010, a base di e datonan di Censo 2010, e limite di pobresa tabata e tempo ey Afl. 1356 pa luna, pa un persona. Na e momento ey a calcula e ‘bestaansminimum’ cu ta e minimo necesario pa un bida aceptabel, na Afl. 1985 pa luna. Sin bay den e detayenan di e dos metodonan y nan punto di salida, por conclui cu hende cu ta biba na e limite di e bestaansminimum no necesariamente por categorisa nan como pober. Esey ta depende di hopi otro factor manera e composicion di e hogar den cual e persona ta biba y cuanto otro entrada tin den e hogar.

Ta importante tambe pa tuma na cuenta cu pobresa no ta algo facil pa detecta y atende. Ningun hende gusta mustra nan situacion real, ni ora nan ta den un situacion unda e pobresa ta obvio. Pero tin señal cu por indica pobresa. Manera mucha cu ta yega scol sin come y sin cuminda. Esey por ta un situacion di negligencia tambe, pero igualmente ta rekeri accion. Di tur manera, nos tin un grupo bastante grandi cu facilmente por cay den pobresa pasobra nan ta caba bao di e limite di e bestaansminimum. Den e decada cu nos falta pa yega 2030 probablemente nos no lo alcansa un situacion unda no tin nada di pobresa. Cuanto nos por limita pobresa ta depende di kico ta haci.

 

LEAVE A REPLY

Please enter your comment!
Please enter your name here