Ta parce cu porfin ta bay cuestiona ministro encarga cu Infrastructura den parlamento. Un bon ocasion pa evalua su maneho completo cu no ta di gaba. No ta violacion di ley di Ordenamento Teritorial so ta e problema. Henter e seis aña cu e ministro ta responsabel pa Infrastructura ta marca cu fayo y incidente cu no tin un splicacion drechi.

 

Henter e maneho di centro di Playa a resulta un desastre. No ta solamente e fonteinnan den Caya Grandi cu awor ta den noticia cu a para bira un luga pa sushi acumula. Ultimo dia ta aparece storia yoron di banda di e ministerio, cu e compania cu a contrata pa dirigi e obra di renobacion di Caya Grandi, no a cumpli y awor e sub contratistanan tin un caso den corte y ta bay warda wak con esey ta bay. Really? Y pakico gobierno, e ministerio aki, mes no ta cuminsa caso pa percura pa e compania aki cumpli? Of por ta cu esey ta bira un poco dificil, pasobra ta ken a eligi e compania desconoci aki pa bin dirigi e proyecto, mientras cu tabatin compania conoci di bon reputacion cu no a considera pa haci esaki? Tabata logico cu un compania cu a bin cay for di cielo lo no a cumpli cu e exigencianan di e proyecto complica aki. Suma na esaki e problemanan di tram, di parkeer y e trato cu e comerciantenan y por splica pakico e plan pa lanta un organisacion pa dirigi desaroyo di Caya Grandi (un asina yama BID: Business Improvement District) a bira un fracaso. Cualkier persona di inteligencia normal por a bisa bo cu bo mester lanta esey na inicio di e proceso, no despues cu bo a tortura nan cuatro aña largo den e proyecto aki.

 

Otro fracaso tabata e proyecto di Linear Park, unda a contrata un compania Venezolano cu a lanta un NV na Aruba pa implementa e obra, mientras cu e compania na Venezuela mes tabata suspendi y no tabatin permiso pa opera pa un periodo di tres aña. No a logra averigua pakico autoridadnan Venezolano a suspende e compania, pero danki na nan amigonan den gobierno di Aruba nan a bin haya manera di gana placa na Aruba. Finalmente nan no a cumpli cu nan obligacionnan y ta Aruba mes mester a caba e trabao. Te awe ainda nos no a haya un splicacion con por ta cu e oferta di e compania aki, cu cual nan a gana e destaho, tabata asina abao pasobra nan no a pone e gastonan di loonbelasting y di prima social y medico aden. Ken a bisa nan cu nan no mester a paga esey?

 

Pero tin mas asunto cu e ministerio aki no ta atende corectamente. Banda di tur e buya tocante e ‘Green Corridor’ practicamente no ta drechando ningun caretera na Aruba y parce cu no tin fondo tampoco disponibel pa esaki. Mal gobernacion? Esey por ta e caso, pero tin cierto cos ta tumando luga cu aparentemente ta bay mas leu cu mal gobernacion. Esey ta e maneho di emision di tereno den erfpacht. Segun palabranan di e ministro mes, por wel di tin un lista di diesun mil persona sperando pa un pida tereno, pero cu e no ta logra saca mas cu 100 permiso pa aña… Si esaki ta berdad, y nos no ta duda di su palabranan den e aspecto aki, anto haya un tereno a bira un loteria, den cual caso e tombola ta poni den e oficina di e ministro aki. Eyden ta dicidi ken ta haya y ken no. Pa colmo, e ministro aparentemente a bin riba e tremendo idea cu pa haya tereno como un di e privilegiadonan, bo mester dedica un suma na un cierto organisacion di su escogencia, pa haci un ‘contribucion social’. Den e caso cu a bira conoci via un e-mail di su secretaria na e compania di un locutora conoci di e radio mas berde di Aruba, ta un club deportivo a bira esun faborece via e metodo nobo aki, cu ta parce masha bunita y social di parti di e ministro, pero ta simplemente contra ley y mester tabata obheto di investigacion penal caba di autoridadnan hudicial. Honestamente, no a straña nos tampoco cu te dia di awe, nada a sucede riba e tereno aki.

 

Riba tur esaki a bin e casonan di violacion di ley di banda di e ministro aki den otorgamento di tereno cu ta pertenece na zona berde, no e berde di e partido pero berde den sentido di ley, cu hasta a bira di mas pa algun di su parlamentarionan cu a bisa cu ta bay pidi interpelacion di e ministro pa loke ta su maneho den e area aki. Ta di spera cu no ta limita e debate na solamente e aspecto aki, pero cu ta contempla e maneho total desastroso cu el a hiba den e seis añanan aki. Lo ta mas facil traha un lista di e cosnan cu el a haci bon den e periodo aki.

LEAVE A REPLY

Please enter your comment!
Please enter your name here