“Pa por logra husticia na tur dos banda, mescos cu libertad di prensa y democracia ta exigi, ta hopi importante pa tin tur dos banda di e medaya,” premier Wever-Croes a destaca den un comunicado di prensa.

Prome Minister Evelyn Wever-Croes, durante conferencia di prensa di gobierno, a trata e tema di un publicacion cu a sali siman pasa di Sociedad Interamericana de Prensa (SIP). Den e publicacion aki, Aruba ta wordo pinta bastante malo y ta cuestiona libertad di prensa na Aruba.

Prome Minister a splica cu e publicacion aki ta bin despues di un situacion cu a tuma luga recientemente, unda cu keho a wordo haci na Gobernador di Aruba, door di un periodista na Aruba, segun e comunicado di prensa. Aki ta referi na periodista Andreina Morillo, kende como ciudadano independiente – y no den nomber di Bon Dia Aruba – a manda un carta na Gobernador expresando preocupacion pa falta di libertad di informacion. Segun Premier Wever-Croes a indica den e comunicado di prensa, ‘a reuni cu e periodista y a adresa tur e puntonan cu el a trece dilanti den su carta. Ademas a splica e otro banda di medaya (e banda di Gobierno), a refuta acusacionnan treci dilanti y a yega na e conclusion cu no tin un censura’.

Sinembargo, Morillo via e-mail a reacciona bisando cu berdad a reuni cu Wever-Croes, pero no a yega na un acuerdo. “Mi ta enfatisa cu loke prome minister y mi persona a papia den reunion ta puntonan di interes di comunidad di Aruba y di prensa en general, pero no a logra un acuerdo pa loke ta trata censura. Su declaracion den su conferencia di prensa no ta corecto y den carta mi a amplia un tiki mas”, el a expresa.
E carta na cual ta referi ta uno cu Morillo a manda pa Wever-Croes dia 26 di april ultimo. Den e carta, e ta gradici Wever-Croes pa su atencion pero ta aclaria cu ‘abo y ami no a yega na ningun conclusion, ya cu durante e reunion cada partido a expone su puntonan pero no a establece ningun acuerdo referente censura’.
“Libertad di expresion y di informacion ta pa henter mundo, nan ta derechonan fundamental cu no ta negociable, sociedad mester eherce eakinan y gobiernonan mester garantisa y protege nan”, Morillo a conclui. E carta tambe a wordo manda na Jorge Canahuati Larach, presidente di SIP; Fernando Totti, director di SIP; y na Gobernador di Aruba.

Publicacion di SIP

Premier Wever-Croes a sigui bisa cu a base di e publicacion cu a sali di SIP, a tuma contacto cu e director ehecutivo inmediatamente y a gradicie pa e interes cu SIP a demostra den defende libertad di prensa na Aruba. A duna splicacion cu libertad di prensa y transparencia ta e base pa e maneho di Gobierno. Y a invita SIP pa un reunion pa papia tocante nan publicacion, pa motibo cu ta di opinion cu e ta sumamente importante pa SIP expone a base di kico e ta yega na e conclusionnan den e publicacion. Cual ta considera conclusionnan detrimental pa e imagen di Aruba y di Gobierno, segun e comunicado di gobierno ta informa.

Den e reunion, Gobierno tambe lo por presenta e otro banda di medaya na SIP. Den e comunicacion cu e organisacion, Prome Minister a termina splicando cu libertad di prensa ta basa riba democracia y democracia ta exigi husticia pa tur dos banda irespecto funcion di un hende. Pa por logra husticia na tur dos banda, mescos cu libertad di prensa y democracia ta exigi, ta hopi importante pa tin tur dos banda di e medaya, segun e comunicado.

“Nos ta bao di e impresion cu SIP no tin tur dos banda di e medaya. Pa e motibo aki, Gobierno di Aruba a invita nan pa asina informa nan di e otro banda di medaya tambe”, Prome Minister a finalisa.

Tin libertad di informacion na Aruba?

E discusion tocante libertad di informacion na Aruba no a cuminsa cu e suceso cu a conduci na e carta manda pa Morillo. Tampoco a cuminsa cu e reaccion di SIP. Den pasado varios biaha caba Bon Dia Aruba a reporta riba e falta di transparencia y falta di informacion den Gabinete Wever-Croes I.

Den un declaracion na portal noticiero Noticia Cla, minister di Telecomunicacion di Gabinete Wever-Croes II, Geoffrey Wever a comenta: “Mi kier remarca si cu e articulo ta menciona transparencia di gobierno y no ta menciona e procedura legal cu Aruba tin den nos leynan cu ta obliga Gobierno pa duna informacion na entre otro prensa, esta e lansverordening openbaarheid van bestuur (LOB). E ley aki ta un ley cu ta garantisa cu gobierno mester ta transparente y divulga informacion. Mi sa cu no ta tur ora informacion pidi basa riba e ley aki ta wordo divulga rapido” e mandatario a sigui bisa. Segun e mandatario, den e ley tin hancra e uitzonderingsmogelijkheden si pa gobierno”.

Sinembargo, no ta e caso cu e ley aki den practica ta garantisa libertad di informacion.
Periodista Luis Villegas, kende tin hopi experiencia cu procedura di LOB, a comenta:
“Contrario na loke minister Wever ta bisa, e Landsverordening openbaarheid van bestuur (Lob) por wel di garantisa acceso na informacion riba papel, pero den practica esaki casi nunca ta realisa.

“Loke mi ta observa despues di haci varios apelacion riba e ley di transparencia y acceso na informacion Lob, ta cu ministernan casi nunca ta duna contesta na un peticion di Lob. Asina mi por mustra cu por ehempel den e coalicion anterior, ex minister di husticia Andin Bikker a ignora un peticion di Lob pa un aña y mey pa despues duna un contesta simpel di menos cu un A4, despues cu mi a forsa e minister via e procedura di derecho administrativo LAR pa contesta. [E minister a keda sin contesta te na ultimo momento, ora hues a determina cu si e minister no contesta e peticion, gobierno mester paga un suma pa cada dia cu e ta laga di contesta e peticion.] (https://www.bondia.com/minister-di-husticia-no-ta-respeta-peticion-di-transparencia-lob/).

“Ora si ta duna un contesta, e contesta casi semper ta negativo. Despues mester sigui un accion lento di haci un obhecion y despues apela, cual ta tuma tempo y placa. E ciudadano no tin instrumentonan legal efectivo contra gobierno cu no kier duna contesta riba un peticion, sea di Lob of cualkier otro cos, pasobra e derecho administrativo (cual ta reglamenta den e LAR) di Aruba ta duna gobierno riba cada fase di e proceso 3 luna pa contesta. Ademas, ora tin chens pa bringa contra e falta di un contesta di gobierno (loke e ley ta yama rechaso ficticio), e ley di LAR ta duna e ciudadano 2 luna den cual mester notifica gobierno riba su fayo. Esaki na contrario di por ehempel e proceso di Hulanda codifica den Awb (Algemen wet bestuursrecht), unda un falta di contesta di gobierno kiermen cu e ciudadano por keha na cualkier momento y no solamente denter di 2 luna despues cu gobierno a nenga di contesta.

“Pero, aparte di e procedura, derecho di informacion ta algo extremadamente politisa na Aruba, pasobra e ley di Lob no ta papia di organo di ehecucion (bestuursorgaan), si no di un minister cu tin cu contesta e peticion di Lob. Asina por ehempel, un minister di finanzas por nenga di contesta un peticion di Lob dirigi na Banco Central, maske esaki ta un instituto independiente, simplemente pasobra e mester bay via e minister. Mescos cu minister di husticia y Ministerio Publico. Un otro ehempel; mi a pidi tur e cuentanan anual di e fondo pa combatimento di criminalidad (criminaliteitsbestrijdingsfonds) na Centrale Accountantsdienst (CAD), pero e instituto aki a forward e peticion na minister di husticia anterior Bikker, kende nunca a contesta e peticion.

“Otro aspecto ta cu den henter e aparato gubernamental no tin un cultura di ta habri cu informacion. [E ta bay asina leu cu te hasta parlamento no tin documentonan di concepto di ley, mocion, etc. riba nan website, algo incomprendibel den 2022.] (https://www.bondia.com/gobierno-ta-talk-pero-no-walk-transparencia/).

“Loke mi ta observa, comparando e procesonan di Lob y esunnan ekivalente na Hulanda (a base di e Wet openbaarheid van bestuur, cual entrante 1 di mei 2022 lo wordo reemplasa pa e Wet open overheid) ta cu na Aruba tampoco tin ambtenaarnan dedica na busca documentonan cu publico ta pidi pe.

“Esaki ta indicativo di e problema central: No tin maneho riba con informacion mester wordo duna na pueblo. E unico consistencia den e ‘maneho’, ta cu generalmente nada ta wordo duna. Hasta ora di pidi bo propio informacion, bo por wordo nenga.

Y kico ta pasa ora un peticion di Lob ta wordo honra? Por corda con ora partido di e actual minister di telecomunicacion mes a pidi varios minister informacion, pero ta solamente ex-minister di infrastructura Otmar Oduber a contesta nan peticion. El a duna nan supuesto rapportnan riba estudio di impacto riba naturalesa, riba un usb stick, cual eventualmente no tabata loke Raiz a pidi. Esaki por wordo considera documentonan haci publico pa un y tur (voor een ieder) si gonbierno no publica esaki riba nan website, por ehempel?

“Lamentablemente parce cu gobierno mes no ta consciente cu un bon maneho di su informacion kiermen cu e por traha mas eficientemente. Cuanto rapport no tin scondi den un lachi den un departamento cu a wordo lubida, analisis haci den pasado cu por ta util ainda awe?

“Finalmente, prome cu minister Wever kier bisa cu Lob kiermen cu gobierno di Aruba ta transparente, [mi ta recomend’e pa bay lesa e entrevista cu mi a haci cu su lider di partido y colega den gabinete Ursell Arends](https://www.bondia.com/ursell-arends-no-tur-minister-ta-tuma-un-lob-verzoek-na-serio/), unda e mes a reconoce e fayonan den e Lob actual y [a boga pa bin cu un ley di Lob nobo](https://www.bondia.com/raiz-ta-sostene-cambio-den-lob-pa-transparencia-by-default/). Sinembargo parce cu e partido cu tanto ta sclama pa transparencia, na momento cu nan a drenta gobierno, a dicidi pa lubida kico nan tabata bringa pe ora nan tabata un partido bystander.”