Sindicato STA a bira e representante sindical di e trahadonan di Post Aruba N.V. despues cu nan a gana e referendum di diamars ultimo, caminda e sindicato anterior SEPPA a abstene di participa.
Aunke STA a gana cu un amplio mayoria di voto su lider sindical, Diego de Cuba tabata bastante modesto pa duna un grito di victoria. E ta considera cu e problema interno den Post Aruba N.V. ta grandi y mester atende cu nan lo mas pronto, mas bien si tin un contacto colectivo (CAO) cu no a conoce cambio pa casi un lustro.
El a bisa cu directiva di STA ta consciente cu e trabou aki ta bay ta sumamente grandi y un tarea bastante dificil, mirando e echo cu gobierno anterior conhuntamente cu e director di e compania aki a laga casi 25% di e negoshi di Post Aruba N.V. bay den mannan di tercera. Esaki ta haci ‘e situacion dificil pero no imposibel’, segun e sindicalista.
Sindicalista de Cuba a considera e referendum aki como uno hopi importante pa STA, mirando e hecho cu Post Aruba N.V. a wordo lubida practicamente durante e ultimo añanan. Nan CAO mes tin mas cu 5 aña cu nan no a bin cu cambio. Aparte di esaki tin problemanan interno, problemanan cu vacatura, salario, comunicacion y tambe problemanan di ekiponan. “Un monton di problemanan cu e trahadonan tabata desea pa nan wordo atendi pa e sindicato anterior cu tabata SEPPA.”
El a haya cu den e referendum aki e trahadonan a bin ‘por la goma’ ya cu di e 93 trahadonan cu por a vota, 70 di nan a vota y di nan 69 a vota pa e sindicato STA. El a traduci esaki como un muestra evidente cu e trahadonan kier mira un cambio. El a laga sa cu STA tin e ekipo necesario pa bay negosha un CAO nobo pa e trahadonan di e compania aki.
Tambe nan kier splica e minister actual cu ta atende cu postkantoor e cambionan cu mester sosode pa pone e compania estatal aki bek riba e caminda cu nan por genera suficiente placa pa sostene nan mes. Pues e prome tarea lo ta un reunion pronto cu e minister en cuestion pa delinea e puntonan cu STA den nomber di e trahadonan kier wak cambionan riba dje. Nan lo solicita e reunion na corto plaso eventualmente e siman aki mes.
