Partido PPA ta propone fortalece legislacion penal contra abuso sexual di menor di edad, incluyendo posibilidad di aumenta castigo te na prison pa bida.

Durante un conferencia di prensa, lider di fraccion di PPA den Parlamento, parlamentario Eduard Pieters, a anuncia cu e partido a pidi un reunion publico urgente den Parlamento cu Minister di Husticia pa evalua e sistema actual di proteccion di mucha, identifica deficiencianan y discuti posible cambio den legislacion.

Segun PPA, Aruba mester adopta medidanan mas severo contra abuso di mucha, mientras ta fortalece prevencion, investigacion y asistencia na victima.

Pieters a splica cu PPA recientemente a reuni cu diferente organisacion cu ta dedica nan trabao na bienestar y proteccion di mucha na Aruba. E reunionnan aki, segun e parlamentario, a brinda e partido informacion importante tocante funcionamento di e sistema actual y e dificultadnan cu organisacionnan ta enfrenta den tratamento di casonan di abuso.

Segun Pieters, e informacion ricibi a fortalece e conviccion di PPA cu ta necesario pa revisa e manera cu Aruba ta atende casonan di maltrato y abuso sexual di menor di edad. E parlamentario a indica cu e partido ta considera proteccion di mucha un prioridad cu ta exigi accion concreto di Parlamento y gobierno.

Pieters a enfatisa cu e preocupacion di PPA no ta limita na abuso sexual. E partido ta considera tur forma di maltrato contra mucha inaceptabel, incluyendo violencia fisico, negligencia y abuso psicologico. Sinembargo, el a señala cu e gravedad di abuso sexual y su posible consecuencianan duradero ta haci necesario pa pone atencion special na e delito aki.

Un di e propuestanan mas importante cu PPA ta presenta ta aumento di castigo penal pa personanan cu comete abuso sexual contra menor di edad. Pieters a indica cu e partido kier explora posibilidad di introduci castigo di prison pa bida pa cierto casonan, cu e intencion di manda un mensahe fuerte contra e tipo di delito aki.

Segun e parlamentario, e propuesta ta busca establece consecuencianan penal mas severo pa personanan cu comete abuso sexual di mucha. PPA ta considera cu e legislacion mester refleha e gravedad di e daño cu e delito por causa na victima, particularmente ora ta trata di menor di edad cu ainda ta den desaroyo fisico y emocional.

Pa implementa castigonan diferente, lo ta necesario pa evalua e marco legal existente, determina cua modificacion ta posible y sigui e proceso legislativo corespondiente.

Pieters a splica cu PPA no kier limita su intervencion na declaracionnan publico. Segun e, e partido a tuma un prome paso concreto mediante un peticion dirigi na presidente di Parlamento pa convoca un reunion publico cu Minister di Husticia.

E intencion di e reunion ta pa examina funcionamento di e sistema actual di proteccion di menor di edad, incluyendo e procedimentonan cu autoridad y organisacionnan ta aplica ora tin sospecha of denuncia di abuso.

Durante e reunion solicita, PPA kier identifica cua parti di e sistema ta funcionando adecuadamente, unda tin deficiencia y cua cambio por contribui na un proteccion mas efectivo di mucha.

Pieters a indica cu e partido ta interesa particularmente den e manera cu diferente institucion ta colabora durante investigacion y tratamento di casonan di abuso. El a enfatisa cu aunke e procedimento y protocolnan ta existi, esaki no ta garantisa cu nan ta ser aplica debidamente.

El a menciona cu, segun informacion comparti durante e reunion cu organisacionnan, Aruba tin diferente protocolo pa atende situacionnan di maltrato. Sinembargo, PPA a ricibi señalnan cu no tur e procedimentonan aki ta ser ehecuta manera ta necesario.

P’esey, e partido ta considera importante pa investiga si e organisacionnan responsabel tin suficiente recurso, personal capacita y otro facilidadnan necesario pa cumpli cu nan tarea.

Otro aspecto cu Pieters a subraya ta e importancia di investigacion profesional y recopilacion di evidencia den casonan di abuso sexual.

Segun e parlamentario, un sistema efectivo mester por identifica y investiga denuncia di manera cuidadoso, pa asina proteha e victima y na mesun momento garantisa cu e proceso penal ta basa riba evidencia confiabel.

Pieters a menciona specificamente e papel cu un medico forense por cumpli den e tipo di investigacion aki. El a señala cu ta importante pa evalua si Aruba tin suficiente acceso na e servicio y si e procedimentonan pa pidi evaluacion forense ta trahando eficientemente.

E parlamentario a reconoce cu cambio den legislacion penal mester bay compaña pa un sistema di investigacion solido. Segun e, castigonan mas severo solamente por cumpli cu nan obhetivo si autoridadnan tin posibilidad di investiga e casonan debidamente y presenta suficiente evidencia durante proceso hudicial.

Pieters a referi tambe na e posibilidad cu, den algun conflicto familiar, por surgi denuncia cu mester ser examina cuidadosamente. El a menciona situacionnan di separacion entre mayornan como un ehempel di circumstancianan cu por complica investigacion.

Segun e, esaki ta un motibo adicional pa fortalece procedimentonan di evaluacion y recopilacion di evidencia. PPA ta considera importante pa e sistema por distingui entre diferente situacionnan y yega na conclusionnan fundamenta, sin compromete proteccion di mucha.

Ademas di castigo penal y investigacion, Pieters a dedica atencion na necesidad di prevencion.

El a splica cu PPA kier promove mas informacion y conscientisacion den comunidad tocante diferente forma di maltrato. Segun e, hopi persona ta relaciona abuso di mucha principalmente cu violencia fisico of sexual, mientras cu negligencia y maltrato emocional tambe por tin consecuencia serio.

Pieters a menciona cu maltrato por inclui negligencia fisico, negligencia emocional, abuso psicologico y situacionnan den cual un mucha ta presencia violencia entre adulto.

Segun PPA, ta importante pa comunidad compronde e diferente manifestacionnan di maltrato, pa asina aumenta posibilidad cu situacionnan preocupante por ser identifica y reporta na tempo.

E partido ta considera cu prevencion mester forma parti di un politica mas amplio, den cual mayor, educador, organisacionnan social y autoridadnan por contribui na proteccion di menor di edad.

Pieters tambe a subraya e tema di asistencia y rehabilitacion di victima.

Segun e parlamentario, abuso sexual por causa trauma cu ta afecta desaroyo emocional y bienestar di un mucha durante hopi aña. P’esey, e respuesta di autoridadnan no mester caba cu investigacion penal of condena di e responsable.

PPA ta considera ta necesario pa garantisa cu victima y nan famianan tin acceso na asistencia profesional pa procesa e experiencia traumatico y sigui cu nan bida.

Pieters a enfatisa cu rehabilitacion y reintegracion social ta importante pa yuda menor di edad maneha e consecuencianan emocional di abuso. E obhetivo, segun e, mester ta pa brinda e mucha oportunidad di desaroya y funciona den comunidad, a pesar di e experiencia dificil cu el a pasa aden.

E parlamentario a señala cu gobierno tin un responsabilidad importante pa crea condicionnan necesario pa e tipo di asistencia aki ta accesibel y efectivo.

Durante e conferencia di prensa, Pieters a indica cu PPA tin planea pa sigui reuni cu organisacionnan involucra cu e meta di amplia su comprension di e sistema y identifica otro posible mehoracionnan.

E partido kier uza e informacion aki como base pa e debate parlamentario solicita y pa eventual propuestanan di modificacion legislativo.

Pieters a expresa tambe su intencion di conoce e posicion di otro fraccionnan parlamentario tocante e asunto. Segun e, proteccion di menor di edad ta un responsabilidad cu ta supera diferencia politico y cu ta rekeri colaboracion entre Parlamento, gobierno y institucionnan competente.

Na final di e conferencia, lider di partido PPA, Otmar Oduber, a expresa su sosten pa e iniciativa di Pieters. El a enfatisa cu e partido ta considera necesario pa adopta un posicion mas severo contra abuso sexual di mucha y pa evita cu e asunto keda limita na discusion publico.

Oduber a referi na casonan penal den cual, segun su e, e castigonan imponi no ta suficiente severo considerando gravedad di e delito y e posible consecuencia pa e victima.

E lider politico a argumenta cu legislacion mester contribui na prevencion, creando un señal cla tocante e consecuencia cu personanan por enfrenta si nan comete abuso sexual contra menor di edad.

Oduber a reconoce tambe cu por tin situacionnan den cual un persona cu comete e tipo di delito ta presenta problema di salud mental. Segun e, e circumstancianan aki tambe mester ser considera den evaluacion di e sistema y e manera cu autoridadnan ta atende diferente caso.

Sinembargo, el a enfatisa cu PPA no ta considera aceptabel pa Aruba sigui enfrenta casonan di abuso sexual di mucha sin evalua si e legislacion y medidanan existente ta brinda suficiente proteccion.

Cu e peticion pa un reunion publico den Parlamento, PPA ta busca habri un discusion formal tocante castigo penal, investigacion, prevencion y asistencia na victima. E partido ta sostene cu proteccion di menor di edad mester ser aborda mediante un sistema integral, cu ta combina legislacion efectivo, procedimentonan confiabel y apoyo profesional pa mucha y famianan afecta.