E siman aki Utilities Aruba NV lo finalisa e acuerdo cu Eagle LNG, segun portal noticiero 24ora. Ruman di Minister di Energia, esta Sr. Gilberto ‘Juni’ Croes, segun e medio lo firma e acuerdo na Miami, pa asina completa e proceso unda tin un compromiso pa WEB tuma e gas natural for di Eagle LNG.

Eagle LNG segun a informa Bon Dia Aruba ta un compania serio cu tin varios planta na Merca, incluso na Jacksonville, Florida cu ta pa abastece e region cu LNG. E compania a pasa un proceso di varios aña pa haya permiso pa un di dos planta, cu awor ta bay construi na Florida tambe.

Pero locual ta importante pa comunidad realisa, a bisa Bon Dia Aruba, ta cu LNG no ta nada otro cu e propio gas natural, pero den forma likido. Y e unico momento cu e ta likido, ta pa por transporte riba bapor. Unabes e yega su destinacion, e gas mester bay den un tanki bao hopi presion, den su forma natural, esta gas. E gas aki, methaan, ta produci mucho menos efecto pa medio ambiente ora di us’e como combustible, compara cu fuel oil. A bisa Bon Dia Aruba cu “unabes WEB cuminza usa gas natural, e impacto ta un caida di como 30 porciento den emision cu ta contribui na cambio di clima.”

Sinembargo, esaki no ta nifica cu gas natural ta sin riesgo. Pasobra un escape di gas, sin cu a kim’e, ta mucho mas dañino pa medio ambiente. Methaan cu ta scapa y ta bay den aire ta mucho mas peligroso pa medio ambiente y clima compara cu CO2, cu ta locual kimamento di fuel oil, gasolin, etc. ta produci. Den otro palabra, mester maneha e gas aki cu hopi cautela. Eagle LNG tin experiencia con pa anda cu gas natural.

Pero, tin varios pregunta. Pasobra Bon Dia Aruba a compronde cu e planta di gas lo no ta cerca di WEB na Barcadera, sino lo bay riba e tereno di refineria. Den otro palabra, pa WEB por haya su gas, e material mester pasa den tubonan presiona for di San Nicolas te Balashi. Ya den pasado a analisa e proceso pa introduci gas como combustible pa e refineria opera y na mesun momento abastece WEB cu gas. GasUnie di Hulanda lo mester a ehecuta e proyecto y e tabata encera tuberia pa e gas cu mester a bay dos meter bao tera. Motibo pakico e tempo a scoge pa pone e tuberia di gas bao tera ta netamente pa preveni cualkier escape y tambe cualkier accidente cu e tubonan. Na e momentonan aki, e fuel oil ta pasa den e tubonan cu ta core for di Zeewijk te na Balashi. Si un di e tubonan mester kibra, lo tin un derame, pero lo por seya e tubo, stop e fluho di fuel oil, pa despues haci e area limpi. Den caso di gas, e situacion ta mas fragil. Un golpi, un accidente cu ekipo pisa lo por produci explosion. Mirando cu e tubonan ta pasa den areanan hopi habita, e pregunta ta si DTI ta exigi pa e tubonan di Eagle LNG pasa bao tera, mescos cu ta e caso cu e proposicion di GasUnie.

Ademas, tabatin un plan tambe pa pone un tanki di gas na Barcadera mes. Aki tambe e tubonan lo mester a core riba tera. APA ya caba tabatin un area designa pa e tanki y e tubonan, di un poco mas cu un kilometer, lo a keda riba tera. Sinembargo, nan lo a pasa den tereno industrial, leu di caretera y leu di area residencial. Pues e pregunta ta keda na Gobierno di con a scoge pa e tankinan di gas pa WEB bay riba tereno di RDA y no na Barcadera, y si e tubonan pa transporta e gas pa WEB lo bay bao tera manera tabata e plan cu GasUnie.

Parlamento

Otro pregunta ta si e Minister no tabatin mester di a bay Parlamento pa cera un acuerdo. Aki a splica na Bon Dia Aruba, cu despues di e destaho publico, e Minister tin autoridad pa actua. Minister Glenbert Croes tin dos pechi den e caso aki. E ta Minister di Energia cu ta un posicion ‘publiekrechtelijk,’ pero tambe e ta e accionista den Utilities. Y como cu Utilities ta un compania priva, durante e reunion di accionista lo por a dicidi pa yega na acuerdo cu Eagle LNG. Ta Utilities ta e instancia cu mester tuma e decision finalmente den acuerdo cu WEB. Pues, aki Parlamento no tin un papel legal pa hunga.

Sinembargo, Parlamento por haci e mesun preguntanan cu algun experto tin, esta pakico no ta pone e tanki di gas na Barcadera y ta scoge pa instal’e na tereno di RDA. Pasobra Parlamento mester enfoca riba bienestar general y particularmente di e residentenan cu ta biba den cercania di e tubonan, pa nan por ta sigura cu nan no ta exponi na ningun riesgo.