E salida anuncia di promer ministro actual, entrante 1 di januari 2027, ta un hecho innegable. Un decision personal cu su base politico lo lamenta y su contrincantenan politico no. Pero e programa oficial di e gobierno ta keda intacto, irespecto e persona cu lo elegi pa asumi e responsabilidad. Mester sigui evalua y huzga e gabinete actual a base di hecho y no di e persona na cabez.

Asina e panorama actual ta keda domina pa e asuntonan cu mas ta yama atencion. Un tema clave ta finalizacion di e trayecto di supervision financiero, cu un propuesta di ley di Reino pronto na caminda pa parlamento Hulandes y un ley local (landsverordening) cu lo mester drenta na vigor hunto cu e ley di Reino, pa e supervision por funciona. Esaki ta indica caba un posible obstaculo, si un o mas parlamentario na Aruba dicidi di no apoya e propuesta gubernamental mas. No ta bisa cu esey lo ta e caso, pero no ta sigur si e actual ministro presidente ta logra pasa e fase clave aki ainda. Esaki tambe pasobra cambio di liderazgo semper por trece desunion den partido, si un o mas integrante no keda satisfecho cu e lider nobo. Na e momento aki no tin un vista cla riba e situacion interno ey.

En todo caso, ta parce inevitable pa tene un reunion parlamentario publico, no tanto pa discuti salida di e ministro presidente, sino pa duna claridad completo riba e trayecto di supervision financiero y mas specificamente e ley local complementario, cu mester aprobacion ainda. Gobierno no tin pakico di teme pa un debate y mester defende su maneho encuanto e topico aki. Ta di supone cu ministro(nan) tin e capacidad necesario pa cumpli cu e tarea aki. Ademas, no por otro cu reconoce e derecho parlamentario riba informacion y debate.

Sin embargo, esaki no ta implica cu ta comparti e critica opositor cu nos por a observa te awor. Por ehemplo algun observacion haci den prensa, entre otro tocante e papel actual y futuro di e colegio di supervision financiero CAft. Nos por a tuma nota di un publicacion di parti di e fraccion social-democrata, cu a sali publica den e medio aki tambe (di 19 di juni 2026), unda ta argumenta cu “Bou di e propuesta actual, Caft lo duna cuenta directamente na Rijksministerraad en bes di rindi cuenta na Parlamento di Aruba.” Esaki ta cuadra cu berdad? Mester un analisis mas extenso aki. Den e ley local (LAft) actual e tareanan di Caft ta describi asina: “Raporta na y conseha e Ministro (di Aruba; red.), gobierno di Reino, como tambe Staten; supervisa e avance di e implementacion di mehoracion di e administracion financiero.” (Laft, articulo 2 di capitulo 2, bao di c y d). No tin caso di responsabiliza directamente na Staten mes.

Kico e propuesta nobo (HOFA) ta bisa? Articulo 14, tocante e tareanan di CAft: “1. Tin un College Aruba financieel toezicht cu, irespecto lo demas menciona den e ley di Reino aki, tin como tarea evalua e presupuesto, e reportahe encuanto ehecucion (uitvoeringsrapportage; red.) y e relato anual segun e normanan, describi den capitulo 2, y conseha conseho di ministro di Reino a traves di Nos Ministro (premier Hulandes; red.) tocante e cumplimento di Aruba cu e normanan aki.” Inciso 3 y 4 di e articulo ta referi na e multiple momentonan cu CAft ta informa e varios partnernan, ministro di finanzas di Aruba, gobierno di Reino y nan representante principal, ministro presidente Hulandes y tambe Staten. Ta trata di duna informacion – obligatorio – na Staten tambe, pero no ta trata di ‘duna cuenta’ na Staten. CAft, como consehero ta envolve e supervisor segun ley, cu ta gobierno di Reino, y no Staten, durante y despues di e proceso di evalua presupuesto. Esaki ta un aspecto clave, pasobra e observacion sugestivo referi ta propaga e idea cu awor no mas, y no desde 2015, gobierno di Reino, awor cu un ley di Reino den man, ta bira e autoridad supervisor, cu por impone medida o sancion riba e teritorio autonomo. E mesun papel ey gobierno di Reino tabatin bao di e ley local (Laft) desde promer momento; nada nobo ey…

Ademas, tin multiple momento cu CAft, como consehero di gobierno di Aruba y di gobierno di Reino, ta den comunicacion cu e ministro di finanzas di Aruba, entre otro tocante presupuesto pero tambe encuanto mehoracion di administracion financiero. Den e caso di un posible ‘aanwijzing’ di gobierno di Reino, ta pasa di antemano den un proceso di comunicacion cu e ministro di finanzas di Aruba, di cual Staten ta keda informa, tocante cambio den presupuesto sugeri pa CAft, pa esaki cumpli cu e normanan estableci. Nos no ta gana ni perde aki, e supervision simplemente ta bisti bachi di ley di Reino…

Otro tereno cu no por keda sin ehecucion ta e dialogo social. Entre 2010 y 2013 e dialogo, dirigi pa e actual ministro presidente, a resulta den algun medida importante, manera cambio di edad di pension pa 65 aña, un tema cu mester trata atrobe. Elegi un solucion viable no ta facil; e alternativanan ta limita. Pone mas peso riba prima social, cobra di empleado y dunador di trabao, lo topa cu resistencia; igualmente manda edad di pension te 66 o 67 aña. Registracion oficial di miles di migrante indocumenta lo yuda fortifica fondo di SVB y AZV temporalmente, pero no lo ta suficiente a largo plazo. Incertidumbre encuanto liderazgo di gabinete no lo contribui na e decisionnan grandi cu preferiblemente mester tuma a base di consulta tri partite.