Nadia Dresscher-Lambertus

Relaciona cu dia di prensa, Bon Dia Aruba a acerca Nadia Dresscher-Lambertus, kende ta un sociologo na Universidad di Aruba pa combersa riba temanan manera e rol di prensa tradicional den un sociedad contemporaneo y polarisacion di medio di comunicacion.

 Sra. Dresscher ta traha conhuntamente cu University of Amsterdam y ta specialisa den investigacionnan sociologico relaciona cu social media y media digital. Su trabou ta pa duna les na e universidad relaciona cu topiconan di sociologia, media y analisis di social networks. En particular sra. Dresscher ta haciendo investigacion pa su PhD relaciona cu politica riba Facebook na Aruba.

”Mi ta siguiendo politiconan riba social media desde cuminsamento di 2013 te cu fin di 2016. Dus mi tin un bista den e tempo cu politica riba Facebook tabata algo relativamente nobo te cu awo, unda cada politico y partido tin nan presencia riba social media.”

Sra. Dresscher ta splica cu e ta studia en particular e networks politico cu ta wordo forma riba social media, pero tambe cua ta e problemanan cu ta wordo treci dilanti den politica, e actornan cu ta trece esaki dilanti y e manera con nan ta trece e problemanan dilanti.

Rol di prensa tradicional den clima contemporaneo
Cu evolucion den tecnologia nos ta wak un cambio den diferente area, y seguramente den area di comunicacion y prensa. Medionan tradicional manera corant, radio y television ta haya nan mes den un situacion unda mester adapta na e clima of core riesgo di bira irelevante. Sinembargo, sra. Dresscher ta di opinion cu e medionan tradicional ta y lo keda importante. “Mi ta kere cu e contexto den cual e medionan tradicional ta opera a cambia”. Segun e sociologo, ta papia kinan di e concepto di hybrid media systems. Esaki el a splica cu ta ora medionan tradicional ta traha den medio digital tambe.

Sra. Dresscher ta duna un ehempel di un corant cu tin su grupo di persona como objetivo, pero cu por yega tambe na personanan cu no ta lesa corant via social media, y vice versa cu personanan cu no tin social media. Ademas, den e clima contemporaneo cu social media e noticia no ta bin cu e intencion preciso cu e autor a pone p’e. Sinembargo e ta expresa cu ‘nunca e noticia tabata wordo ricibi exactamente cu e intencion di e autor, tur hende ta percibi cosnan na diferente manera y nos tur ta formula nos opinion di e noticia’.

“E noticia ta bin cu ful un aura for di tur e hendenan cu a comenta riba dje. Dus bo por bisa cu bo ta lesa e noticia hunto cu otronan. E ta un experiencia hopi mas interactivo”.

E mesun dinamismo aki, sra. Dresscher ta splica, ta influencia e ciclo di noticia. “Den pasado por tabata e caso cu e prensa ta determina e agenda y prioridadnan di noticia, pero awendia nos ta wak cada biaha cu nos tin mas influencia riba esaki. Nos tambe ta construi media.”

Un manera cu por ilustra esaki di un manera humoristico, ta e varios remixnan cu a wordo crea di e segundo debate politico na Kamer van Koophandel. E importancia y percepcion di e debate aki a wordo forma tambe pa e diferente perspectiva humoristico riba esaki. Te hasta na e conferencia di prensa como respuesta riba e controversia di e debate, presidente di Camara di Comercio mes a toca su jingle crea pa un persona riba internet. Pa e reportero aki, e momento ey tabatatin un elemento di surrealismo, pero e por refleha di algun manera e estado di medionan di comunicacion awendia.

E efectonan cu clima contemporaneo di medionan por causa tin su parti negativo y positivo, sra. Dresscher a splica. Algo positivo cu por surgi di esaki ta e manera con grupo di hende ta organisa nan mes. Sra. Dresscher ta duna e ehempel di ‘e debate rond di amienda pa permiti parehanan di mesun sexo pa registra nan relacion y pa esaki wordo reconoci’. Esaki ta un movemento cu a wordo mobilisa y cu a busca sosten riba plataforma di social media. Alabes, sra. Dresscher ta remarca cu e contrincantenan di esaki a organisa nan mes tambe. “Esaki por claramente ilustra con diferente networknan ta mobilisa pa un causa”.

Filter bubble of echo chamber effect
Un efecto negativo cu e clima di medionan digital por tin ta un tipo di isolacion y un echo chamber effect, segun sra. Dresscher. “E filter bubble of efecto di echo chamber ta ora bo ta haya opinion y articulo riba internet of social media cu ta sirbi pa confirma bo mesun opinion. E ta impedi pa bo haya diferente perspectiva di un manera of otro.”

Aunke e fenomeno aki ta sirbi pa dramatisa e efecto di isolacion, sra. Dresscher ta splica cu esaki semper tabata e caso, te hasta prome cu social media. “Semper e personanan cercano na bo ta hunga un rol importante pa formacion di opinion y perspectiva riba e mundo rond di nos. Esaki ta un fenomeno humano, y nos ta yam’e homofilia.”
Awendia tecnologia ta hunga un rol hopi grandi den esaki. Sra. Dresscher ta splica cu: “e algorithm di servicionan manera Facebook ta dicidi p’abo cua noticia of informacion bo ta haya. Pa medio di studia ken bo amigonan ta, cua opinion tin entre boso, e algorithm por determina cua noticia bo ta haya.”

Un algorithm ta e manera con un computer ta programa pa colecta y procesa informacion. E algorithm por wordo programa pa rasona cu informacion y identifica esaki di cualkier manera. Sra. Dresscher ta splica cu den e caso di Facebook, cua ta e social media mas uza riba Aruba, ‘e algorithm ta pone un balor riba tur post. Ora bo wak un post tin ful un proceso den e background cu ta tuma luga’.

Segun sra. Dresscher, “e postnan ta wordo sortia a base di con nobo nan ta, cuanto reaccion tin riba dje, pero en particular si e hende cu a post esaki ta un persona cu bo conoce. Tur esaki Facebook ta calcula den e background. Asinaki Facebook ta dunabo noticia of post di un amigo cercano hopi mas lihe cu algo di un persona desconoci.”

Sra. Dresscher ta splica cu si bo no sa e procedura aki y con e ta traha, ‘bo por kere cu ora bo wak bo news feed e ta algo neutral. Pero esaki no ta berdad.’

Cu medionan tradicional manera corant, pa por ta un persona literato ta importante pa tene cuenta cu diferente pregunta. Entre otro, ken a skirbi e articulo, ki perspectiva nan ta duna, kico ta e meta di e articulo, ken ta esnan cu ta paga pa propaganda, e corant tin un ideologia, etc. Sra. Dresscher ta splica cu ‘esaki tur ta keda hopi relevante. Pero tambe mester tene cuenta cu loke nos ta yama e network effect’. Sra. Dresscher ta splica cu esaki kiermen cu mester analisa tambe unda bo a wak e noticia online prome.

Si un persona ta desea di sali di e filter bubble aki, sra. Dresscher ta recomenda pa trece mas diversidad den bo network. “Si ta trata di politica, like tur e politiconan y tur partido. Pero tambe si bo tin un amigo of amiga cu tin un opinion diferente na bo, purba wak kico e mes ta post. En general mester evita pa keda den un grupo cu ta laga bo isola cu un perspectiva.”