Den cuadro di e preparacion pa implementacion di e Codigo di Proteccion Infantil y Hubenil, bou auspicio di Ministerio di Asuntonan Social y Labor, a cuminsa cu e prome tanda di tayer pa e sector di salud cu e profesionalnan di Wit Gele Kruis (WGK) y Jeugdgezondheidszorg (JGZ) di Directie Volksgezondheid.

Codigo di Proteccion Infantil y Hubenil, popularmente conoci como ‘meldcode’ ta cubri 4 sector (husticia, salud, social y enseñansa) y cada sector tin un lider di proyecto cu ta encarga pa sinta cu tur e profesionalnan di su sector pa delinea e implementacion y ehecucion di e ley. E ley aki ta encera a pasonan cu cada sector profesional mester tuma, pa brinda proteccion contra abuso y maltrato di mucha y hoben na Aruba.

Durante e prome tanda den sector di salud cu e profesionalnan di WKG y JGZ, a traha riba un analisis di SWOT,pa sondeae puntonan fuerte y e puntonan di mehoracion den e cadena di cuido pa nos muchanan na Aruba. Loke a resalta ta cu WGK ta e unico instancia ta cu ta mira tur e muchanan di Aruba. Esaki ta un punto cardinal den formulacion di e protocolnan di trabou pa cu e implementacion di e Codigo di Proteccion Infantil y Hubenil.

Mester remarca y enfatisa cu e trayecto aki lo continua tambe den e otro sectornan, pa asina na october proximo, e ley keda presenta den Parlamento y asina haya su contenido den nos comunidad. Riba e potret por mira e Team Pariba di Brug durante e prome tayer.