Manera cu nos tur por corda den luna di maart Aruba mescos cu henter mundo a conoce un clausura historico di nos frontera. Despues di varios luna di evalua y monitorea e situacion y te ora cu Aruba a sinti cu ta cla a dicidi di cuminsa habri frontera den un manera gradual cuminsando algun siman pasa cu e islanan di Curaçao y Bonaire.

E siman aki a toca turno na e region di Europa, asina ta cu diasabra atardi dia 4 di juli Aruba a yama bonbini na e prome vuelo internacional comercial cu un total di 207 pasahero procedente di Amsterdam, Hulanda. Alrededor di 20% tabata turista cu a scoge Aruba pa nan por disfruta di nan dushi vacacion.

Tur esnan cu a presencia e yegada di KLM a sinti un alegria y emocion enorme pasobra oficialmente por bisa cu Aruba ta unabes mas “open for happiness” aunke a menciona na varios ocasion cu e re-apertura lo ta sucediendo den un forma gradual y modera na comienso. Pa duna un ehempel si den un luna Aruba normalmente tabata ricibi 25,000 turista pa luna den juli, pa e aña aki esaki lo ta rondo di 7,000 te cu na e momento aki.

Aruba ta tumando tur precaucion necesario pa mitiga y mantene riesgo di contagio abou y ta pa e motibo aki e medidanan ta multiple teniendo cuenta cu entre otro e hecho cu Aruba su maneho ta basa riba 100% test, sea promer cu yegada of na yegada. Y manera cu a wordo anuncia recientemente e rekisito adicional cu a caba di a wordo agrega na bishitantenan cu ta biniendo di areanan di halto riesgo cu no lo tin opcion di haci e test na Aruba pero lo mester “upload” e resultado prome cu sali pa Aruba.

E rekisito aki lo ta aplicabel pa residentenan di e siguiente estadonan: Alabama, Arizona, Arkansas, California, Colorado, Florida, Georgia, Idaho, Iowa, Kansas, Louisiana, Mississippi, Nevada, North Carolina, Ohio, Oklahoma, Oregon, South Carolina, South Dakota, Tennessee, Texas, Utah, Wisconsin, Wyoming.

E situacion na Merca lo sigui wordo monitorea di cerca pa asina evalua kico lo ta e pasonan cu mester tuma pa asina salvaguardia e siguridad di nos comunidad y nos bishitantenan. Ta di remarca cu Aruba su mercadonan principal ta riba bon caminda y ta manehando e virus aki den un manera positivo.

A.T.A. kier gradici tur socio kende a bin ta traha incansablemente pa Aruba su turismo por habri bek. Ta subraya e responsabilidad colectivo y individual cu nos tin. Ta nos mes mester carga e responsabilidad di keda practica tur e protocolnan di higiena manera mantene distancia y laba man. E siman aki lo ta un otro momento historico na unda cu nos lo yama bonbini na nos bishitantenan di Merca cual ta Aruba su Mercado principal pa cu turismo.

Pa cualkier pregunta of informacion por semper bishita e website oficial cu ta www.aruba.com ta contene informacion extenso y corecto di tur procedura y protocol.