Mirando cu nos a drenta e temporada di Horcan, Directie Volksgezondheid, tambe conoci como DVG a publica tip pa asina informa e comunidad di kico por haci pa prepara pa e temporada di horcan aki.

Despues di pasada di un horcan, e proceso di restauracion ta cuminsa. Restauracion di no unicamente locual ta material, pero tambe restauracion emocional.

Pa hopi persona, experencia un horcan por ta un acontecimento traumatico of tristo, pa cual motibo ta importante pa scucha otro y brinda un schouder pa yora y desahoga, ora ta necesario.

Pa locual ta restauracion di propiedad y vivienda, sea cuidadoso na momento di haci limpiesa paden y pafo di cas.

Deshaci di tur alimento cu por ta un peliger pa salud di bo mes y bo famia, manera cuminda cu a muha cu awa di yobida of cu a ‘defrost’. Tambe kita for di den caminda materialnan kibra y peligroso manera glas, palo y mas.

E dianan despues di pasada di un horcan, por ta dianan dificil yena di angustia y insiguridad. E miho conseho ta pa busca refugio, consuelo y sosten cerca famianan cercano.

Ademas di proteha nos mes, nos tin cu proteha nos mascotanan tambe pa motibo cu nan tambe ta forma parti di nos famia.

Durante e temporada di horcan ta hopi importante pa prepara un plan di emergencia pa famia, pero tambe pa e mascotanan di cas.

Algun tips pa por prepara bo mes pa bo mascotanan ta proteha den e temporada aki ta:

  • Prepara un espacio cu ta duna proteccion contra awa y biento fuerte. Si e mascota pro ta paden cerca di famia ta miho. Esaki lo yuda mantene e mascota trankilo.
  • Percura pa e espacio ta confortabel cu ta contene awa, cuminda y obhetonan preferi di bo mascota.
  • Zorg pa tin suficiente cuminda y awa pa e mascota, minimo durante 7 dia.
  • Acumula materialnan necesario pa mantene higiena di bo mascota durante e dia/oranan cu e ta den cas. Materialnan manera papel di corant, saco di sushi y pads pa vloer, entre otro.
  • Si durante of despues di horcan bo famia mester evacua, hiba bo mascota cubo, no lag’e atras.

Keda pendiente pa mas informacion tocante con pa prepara den e temporada di horcan aki.

 

LEAVE A REPLY

Please enter your comment!
Please enter your name here