Ayera diabierna, e presidente di Chile, Sebastián Piñera a ricibi e prome dosis di e vacuna cu a wordo elabora pa e laboratorio Chines Sinovac, na e momento cu e pais a vacuna caba den un siman mas di 1.5 miyon persona cu por lo menos un dosis y ta keda lider den e region.
“E vacuna aki ta sigur, eficaz y nos a haci un esfuerso grandi pa por haci un vacunacion pa tur e Chileno y tur ciudadano di e pais aki”, Piñera di 71 aña a bisa y a sigura cu lo pone e di dos dosis e dia 12 di maart.
Asina Piñera a uni pa e lista di mandatarionan y hefenan di Estado na rond di mundo cu a wordo vacuna, como Joe Biden (Merca), Alberto Fernandez (Argentina), Francisco Sagasti (Peru) of Reina Isabel 2 di Inglatera.
Di e total di personanan vacuna cu un dosis desde 3 di februari pasa y te diahuebs ta 748.417 adulto mayor di 73 aña. Mientras cu 59.9% ta coresponde pa hende muhe y 40.1% pa hende homber.
Cu 83.6% di e poblacion vacuna, e localidad chikito di Laguna Blanca na extremo sur di e pais, ta lider di e lista di e prome dies comuna cu avance di vacunacion, sigui di Rio Verde cu 49.2%
“Chile ta entre e paisnan cu mas a wordo vacuna na mundo y nos lo sigui cu esaki, pero tambe mi kier pidi boso pa no descuida y sigui cumpli cu e norma sanitario”, el a sigura.
Segun ultimo datonan di registro Our World in Data, di Universidad di Oxford, Chile ta e pais cu mas lihe a avansa den proceso di vacunacion, a wordo administra 5.58 dosis pa cada 100 habitante, un cifra hopi mayor cu e media mundial (1.9 dosis pa cada 100 habitante).
