Diahuebs ultimo a tuma luga e ceremonia di grounbreaking of inicio di e trabou di construccion di e proyecto hotelero Secrets Baby Beach Resort na Sero Colorado. E proyecto di construccion aki lo dura alrededor di dos aña pa bin cla, caminda ta wordo inversion mas cu 2 miyon dollar den dje.

E celebracion aki a conta cu representantenan di e Grupo Martinón cu lo realisa e proyecto aki. Tambe tabatin presencia di gobierno, entre nan Prome Minister di Aruba, Evelyn Wever-Croes, y demas miembro di su gabinete cu excepcion di minister Glenbert Croes y minister Rudy Lampe kendenan no tabata na Aruba. Igualmente tabatin presencia di invitadonan tanto di e sector publico y priva.

Grupo Martinón.
Presidente di e Grupo Martinón, Enrique Martinón a gradici tur esnan cu a bay compaña nan na inicio di e proyecto aki. El a sigura cu e proyecto aki lo ta uno di ‘gran impacto’ y lo trece un cambio hopi positivo pa San Nicolas, su hendenan y e destino turistico di Aruba.

El a gradici nos autoridadnan local, pero tambe na San Nicolas Business Asociation y e gremio di prensa. Pero di forma masha special el a gradici nos minister di Infrastructura y Medio Ambiente, Otmar Oduber kende pa su ‘entusiasmo y su compromiso cu San Nicolas a bira e motor y guia’ di e proyecto aki cu a inicia.

El a haci referencia riba historia di e grupo Martinón funda pa su tata, Enrique Martinon Sr. kende a bin atende e inicio di e proyecto Secrets Baby Beach Resort. E grupo a inicia na Isla Canarias concretamente den e isla di Lanzarote durante añanan 70. Igualmente el a bisa cu apesar cu e isla aki ta un tiki mas friu compara cu Aruba, ambos isla ta mantene cierto similaridad. Esaki ta un echo, ademas cu nan ta isleño, cu a contribui pa nan a wordo acerca pa papia riba Aruba, y tambe riba e posibilidad di desaroya un proyecto hotelero. Pues nan interes a lanta di biaha. El a declara cu nan proyecto hotelero specialmente den e isla di Lanzarote ta pone atencion semper riba maneho of gestion di halto sostenibilidad y tambe uzo masha eficiente riba tereno di consumo di awa y coriente. Presidente di Grupo Martinón a bisa cu actualmente nan tin 26 propiedad hotelero na Isla Canarias.

Ademas di nan inversion den e isla di Lanzarote, e grupo a dicidi di inverti den e region Caribe, cuminsando na Cuba. Den e isla aki nan a constitui e prome empresa mixto di e sector turistico. Despues nan a dicidi di haci inversion den e Caribe Mexicano y despues nan marca a bay na Republica Dominicana, caminda nan a bin desaroya nan ultimo proyectonan.

Nan ta un grupo cu ta conta cu un total di 6 mil camber hotelero y 3 mil proyecta den 5 aña. Igualmente el a declara cu nan a pone tur nan experiencia y conocemento pa inicia e proyecto hotelero Secrets Baby Beach Resort na Sero Colorado.