Parlamentario Ady Thijsen (MEP)

E asunto cu gobierno no a ratifica e ley di supervision financiero (LAft) cu e cambionan cu Parlamento a haci den dje, ainda no ta un capitulo cera pa nos organo legislativo. Presidente di Parlamento, Ady Thijsen a declara na Bon Dia Aruba cu den e asunto aki gobierno mester cumpli cu loke nos constitucion mes ta prescribi.

Thijsen ta haya cu den e caso aki mester tene cuenta tambe cu e proceso democratico y bay segun constitucion, con nos ley ta tuma luga, con e ta wordo aproba y con e ta wordo ratifica. Den e tratamento di un ley, e parlamentarionan tin e derecho constitucional pa haci cambio of amienda, manera a sosode cu e ley di LAft. E dia cu a vota riba e ley, Parlamento a haci cu e amienda of cambio cu a keda aproba. Sinembargo lo unico cu a falta ta pa gobierno ratifica e ley.

Presidente di Parlamento a declara na e matutino aki cu semper e proceso aki ta sosode cu e ley ta wordo ratifica. Sinembargo e constitucion ta bisa bo cu gobierno tin e derecho pa keda sin ratifica un ley. Pero si gobierno ta keda sin haci’e, ‘e tin cu notifica e Parlamento’. Den e caso aki gobierno mester duna Parlamento kico ta su motibonan pakico e no ta ratifica e ley.

Motibonan y reunion.
El a afirma cu gobierno a manda un carta y nan a duna algun argumentacion pa kico nan no a ratifica e ley di LAft cu Parlamento a aproba. Pero despues di esaki, e proceso ta indica cu mester bin un debate of reunion publico cu Parlamento mes mester yama.

Presidente di Parlamento a declara cu gobierno mes den su carta a bisa cu e ta dispuesto pa bin Parlamento. Sinembargo Thijsen a bisa cu ta keda den man di Parlamento si ta bay acepta si of no loke gobierno argumenta den su carta. P’esey el a sigura cu e ‘reunion aki mester bin’. Den caso cu Parlamento no ta acepta e argumentonan di gobierno pa no ratifica e ley di LAft, esaki lo por trece un problema constitucional cune.

Bon Dia Aruba a trece dilanti cerca presidente di Parlamento si esaki lo por duna espacio pa nos organo legislativo bin cu un mocion di desconfiansa contra gobierno. Thijsen a argumenta cu mester mira e situacion den su contexto, ya cu no ta pasobra gobierno no a ratifica e ley di LAft, esaki no kiermen cu tin un desconfiansa. E ta bay pakico gobierno no a haci’e.

“E ta bay si nan motibonan cu nan tin, ta motibonan valido,” el a bisa.

Como miembro di Parlamento, e tin su pensamento y sigur tur fraccion tambe tin su pensamento. P’esey ta relevante pa bin cu e reunion. “Nan tin di duna di conoce,” el a bisa. Den e caso aki e prome mandatario tin cu responsabilisa su mes dilanti Parlamento pakico e no a ratifica e ley di LAft.

Si e parlamentarionan por ehempel ta considera cu e motibonan no ta valido, e por desemboca den un mocion di desconfiansa. Pero tambe por ta asina cu despues cu Parlamento ta evalua tur cos, nan ta reconoce cu gobierno tin su rason pa no ratifica e ley di supervision financiero.