Ayera Sindicato Aduanero di Aruba (SADA) a celebra Dia Internacional di Douana cu sentimento mixto.

Di un banda contento cu nan por tin un dia special cu e aña aki nan no por a celebra manera e añanan anterior debi na e pandemia. Pero di otro banda nan a celebr’e cu un smaak amarga.

SADA ta sinti cu nan trabao no ta wordo balora pa nan dunado di trabao, esta gobierno. A pesar di cualkier palabra di pabien y felicitacion cu nan por a divulga den media. “Esun prome yama pa balora e cuerpo no ta duna cara…” presidente di SADA, Edward Maduro a declara na Bon Dia Aruba.

E ta haya cu e tipo di felicitacion aki ta uno ‘no sincero, pasobra durante aña bo no ta balora e cuerpo.’ Maduro ta agrega cu nan ta lamenta e situacion aki pasobra no ta e hecho cu un hende a haci aña riba un dia bo ta core felicit’e. Den e caso aki un cuerpo di aduana cu ta uno importante pa nos pais.

El a laga sa cu e celebracion di nan dia a bay hopi trankil. Tampoco nan no tabatin nan custumbra celebracion di misa, y nan encuentronan cu otro cuerponan di aduana di nos region como un forma pa integra nan mes, a keda cancela. “Manera carnaval tur cos a cancela. Ban spera cu otro aña cos lo normalisa pa nos por celebra e dia,” el a bisa.

Reflexion

Pero si e pandemia no a kita cu Dia Internacional di Aduana a bira uno di reflexion pa e miembronan di e cuerpo uniforma aki. Principalmente un dia pa recorda y gradici e trabao cu nan ta eherce debidamente, segun Maduro.

El a trece dilanti cu e no ta un trabao facil. Aunke tur trabao tin su retonan. Pero ora cu ta trata di un organisacion importante den aparato gubernamental, nan mester uza tur e recursonan disponibel pa genera mas impuesto of entrada den caha di gobierno.

Pero di otro banda tur e control cu nan tin cu haci directamente cu impuesto. E ta un trabao di control por ehempel riba mercancianan cu sea ta prohibi of cu mester di un permiso special pa nan wordo importa. Igualmente tur e tipo di control extra, ya sea administrativo y fisico, cu nan ta realisa tur dia.

E trabaonan cu nan ta desplega den nos area di frontera cu ta uno delicado te hasta peligroso. “E ta un dia pa bo reflexiona y sigur wak e balor agrega di e cuerpo di aduana na e pais,” segun presidente di SADA.

Reto y malcontento

Como presidente di e sindicato cu ta representa e personal di aduana e ta lamenta cu tin situacion cu por bay miho, specialmente cu nan dunado di trabao.

Maduro a bisa cu nan no ta pasando den e miho momento pa loke ta trata e atencion cu nan ta haya for di su dunado di trabao. Esey ta lo mas lamentabel. Pero nan coleganan ta purba di pone nan un banda y tambe purba di deal cu e diferente situacion cu ultimo añanan a bira pio, segun e sindicalista.

Nan ta confronta diferente reto, pero esunnan cu ta causa mas dolor cerca e duaneronan ta e promesanan cu no a wordo cumpli cune. Presidente di SADA a bisa cu nan organisacion sindical pa basta aña ta andando cu varios procesonan. Y ora nan ta kere cu a keda cla, caminda a bin eleccion cu un cambio di gobierno cu a duna palabra, y tambe a priminti cu ta bay cumpli cabalmente cu locual a wordo firma cu tin di haci cu e parti di reorganisacion. Pero ya caba a transcuri mas cu tres aña caminda nan a bay varios biaha den accion y tambe den corte y nada a wordo resolvi.

E ta haya cu esaki ta un parti cu cuerpo di aduana a sinti’e como hopi menosprecia dor di e gobierno actual. Aworaki nan ta den corte y esaki – segun presidente di SADA – ta un di e dolor mas grandi cu ta bibando den e cuerpo uniforma aki. Mientras cu duana ta un cuerpo cu ta contribui substancialmente den caha di gobierno. Ya cu despues di departamento di Impuesto (DIMP) nan ta esun cu ta genera mas placa pa gobierno.

 

 

 

LEAVE A REPLY

Please enter your comment!
Please enter your name here