Den cuadro di maneho di migracion, for di algun aña caba a scucha cu lo implementa visa obligatorio pa personanan cu nacionalidad Venezolano cu ta desea biaha pa paisnan di Caribe Hulandes. Esaki a keda formalisa desde dia 15 di januari ultimo.

Durante pandemia di Covid-19, Gobierno Hulandes lo trata visa solamente pa biahenan special, segun un comunicado di Departamento di Integracion, Maneho y Admision di Stranhero (DIMAS) a afirma.

Mester a implementa e introduccion di e proceso aki for di aña pasa, pero pa motibo di e pandemia di Covid-19, esaki no por a tuma luga; tampoco por a solicita esaki na un embahada, consulado general, of VFS Global te e momento aki.

Aunke den un articulo di Bon Dia Aruba dia 17 di december di aña pasa a publica cu segun autoridadnan Venezolano, den un nota di prensa divulga pa e canal di television Globovision, tabatin negociacionnan tumando luga entre Venezuela y Reino Hulandes relaciona cu habrimento di frontera pa islanan Hulandes, te ainda e fecha di e reapertura no ta conoci.

Segun e nota: “E fronteranan entre Venezuela y e islanan Aruba, Bonaire y Curaçao ta cera desde februari 2020, como consecuencia di e posicion asumi pa Hulanda, alineando cu gobierno di Merca pa aumenta e agresionnan contra gobierno Bolivariano”, vice-minister pa Europa di ministerio di Relacion Exterior di Venezuela, Yvan Gil a señala.

Prome minister Evelyn Wever-Croes durante un conferencia di prensa a expresa cu aunke lo tin un visa obligatorio pa Venezolanonan drenta Aruba, e frontera lo permanece cera. Tambe el a menciona cu “no sa si nos ta bay yega na e punto pa habri’e”.

Aruba a prolonga e ciere di frontera te dia 10 di maart 2021. Esaki ta sucediendo cada tres luna, asina desde mei 2019, cu evaluacion cada bes, segun e mandatario. Di otro banda, Wever-Croes ta señala cu e ta realisa cu e frontera no por keda cera cu un pais cu cual no ta na guera.

Si un persona di nacionalidad Venezolano tin interes di biaha pa algun pais di Caribe Hulandes manera Aruba, Corsou, Sint Maarten, Bonaire, Sint Estuatius of Saba mester busca informacion riba website www.nederlandwereldwijd.nl.

Ademas di introduccion di visa tambe lo implementa otro condicionnan, como:
-A-ESTA (autorisacion di biahe);
-APIS (proceso de pre-screening di informacion di e biahero);
-Online ED-Card (Carchi di embarcation y desembarcation online).

Den conexion cu Covid-19, Ministerio di Asuntonan di stranheria tin su servicionan limita pa procesamento y solicitudnan di visa pa paisnan den Caribe Hulandes. Nan ta atende casonan cu por wordo considera como vital y esencial:
-Personanan cu tin un VTA (admision temporal pa Aruba);
-Biaheronan M.I.C.E. pa motibonan di reunion, incentivo, conferencia o exposicion;
-Biahe di negoshi, interes, cu vinculo comercial of como parti de un mision economico;
-Doñonan di algun residencia, condominio of time share.

Bishitantenan cu proposito di turismo, familiar, etc., procedente di un cu ta rekeri visa, ta conta cu medidanan tuma den relacion cu Covid-19 y servicio di procesamento di visa cu ta keda suspendi te cu proximo aviso.

Esunnan cu ta keda exonera di visa ta personanan cu ta biahando den transito, personanan cu ta un rato solamente den waf, como ehemplo esunnan cu ta bin cu cruceronan y ta sigui nabega, si e persona tin un permiso di residencia permanente of temporal pa e siguiente paisnan di otro parti di Reino Hulandes como Merca, Canada, Teritorio Schegen, Reino Uni of Irlanda y tur ciudadano cu tin un visa di entrada multiple valido pa teritorio Shegen (visa Schegen).

Si un ciudadano procedente di un pais cu ta rekeri visa den caso di bin Aruba pa un biahe special y vital mester aplica den caso cu ta trata di un visa pa biahe cu segun maneho ta considera como esencial y vital, e procedura ta disponibel na e website www.nederlandwereldwijd.nl na unda e persona mester yena e formulario online.

Mester introduci tur documento necesario pa asina por haci un pre-screening y por prueba e motibo cardinal di e biahe. Solamente esunnan categorisa como esencial y cardinal lo wordo selecciona pa evalua si tin capacidad pa continua cu e proceso.

Relaciona cu esaki, por a lesa algun comentario cu usuarionan di rednan social a publica riba e topico aki, di e cual e mayoria ta aproba e decision aki pa diferente motibo, entre nan seguridad.

LEAVE A REPLY

Please enter your comment!
Please enter your name here