Presidente di SADA yama bek na trabou Edward Maduro: Hues lo confirma cu ta trata di ‘persecucion personal’

Despues di seis siman cu a manda e duanero y Presidente di sindicato SADA, Edward Maduro cas relaciona cu un investigacion di un arma di candela cu a somenta for di nan post na waf di Barcadera, finalmente a incorpor’e bek na trabou.

Den e caso aki a manda cuater duanero cas pa duna espacio pa un investigacion interno. Di nan, dos a bolbe trabou, entre nan Presidente di SADA, mientras cu e otro dos ta na cas ainda. E no ta na altura si a haya e arma, un pistol Glock GYM 090, of no. Tampoco no a interog’e y e no ta na altura si a aclaria e investigacion.

Maduro ta insisti cu su envolvimento den e caso aki, como supervisor na pia di trabou, e ta califica como un ‘persecucion’ contra su persona como Presidente di SADA.

Cu uniform bisti y pafo di su liga di trabou, Maduro a declara cu nan a manda nan cas pa seis siman y cu un posibilidad di extende pa 6 siman mas. Siman pasa e seis siman a transcuri y nan a yam’e bek pa bin traha. Maduro a indica cu den un caso asina normalmente nan ta extende cu 6 siman extra.

El a trece dilanti cu e pensamento di e directiva di SADA ta cu esaki ta trata di un persecucion. Ya cu ta obvio cu no tin nada, pero no obstante esey, y anticipando cu nan por a haya 6 siman extra, nan a bay corte pa un caso sumario pa atende cu e asunto aki. Pero ainda e decision of veredicto no a cay, e lo bin te dia 4 di november awor. Pero pa nan sorpresa nan a haya un carta cu no lo extende e negacion mas, y el a cuminsa traha siman pasa. Sinembargo, e ta haya cu e fayo faborabel di hues lo pone peso y confirma cu esaki tabata un accion contra su persona.

Sin prueba.
Maduro a splica cu den un caso di ‘toegangsontzegging’ bo man ta mara, caminda bo no tin acceso na bo pia di trabou, pa asina e investigacion interno por tuma luga. Pero e ta kere cu no mester ta asina cu mester duna ‘ontzegging’ na cada ken cu nan ta haya gana. Sino cu e mester wordo basa cu pruebanan fuerte. Esey ta loke nan a ilustra cerca e Hues durante e tratamento di e caso.

E sindicalista ta para duro cu e caso aki no mester a bay asina leu. Y aunke nan no ta sinta den stoel di e director di e cuerpo uniforma aki, pero e ta haya cu tabatin otro manera pa atende cu e caso aki.

Encuanto e situacion di e dos coleganan relaciona cu e investigacion aki cu ainda no a bolbe bek na trabou, Maduro a bisa cu sindicato SADA ta lucha pa nan miembronan. Aunke no tin hopi duanero cu no ta miembro, ya cu mayoria di nan ta miembronan di SADA, semper nan ta para pa nan coleganan.