Presidente di SIWA, Eric Henriquez ta lamenta cu despues cu nan miembronan y trahadonan di WEB N.V. a contribui cu 1.5 miyon florin den e fondo di solidaridad (FASE), ‘nos ta e malo nan den e pelicula aki’.

Henriquez a cualifica e situacion cu un gran mayoria di compania y instancia estatal no a contribui cu e fondo aki di un ‘negligencia’ total di parti di gobierno cu a permiti cu e cos aki a bay for di control. Ya cu for di e prome luna nan por haya sa cual compania si y cual no a contribui cu e fondo di solidaridad di biaha.

Contribucion

 

E sindicalista a dicidi di manda un carta na principio di november na gerencia di WEB pa stop e contribucion di nan miembronan y trahadonan di e compania estatal aki na e fondo di solidaridad, despues cu nan a mira un post di minister di Finanzas y Asunto Economico. Den e post aki nan por a mira cu di tur e companianan estatal, solamente 4 pa 5 tabata contribui realmente cu e fondo di solidaridad aki, esta FASE.

Pa presidente di SIWA, Eric Henriquez, esaki ta inaceptabel, y p’esey nan a bin cu e peticion aki a base di e protocol firma, y cu a wordo honra dia 24 di november ultimo dor di Gerencia di WEB N.V.

E trahadonan di WEB y miembro di SIWA a duna 1.5 miyon florin caba. Mientras cu SETAR a aporta cu alrededor di 2 miyon florin, ya cu nan tin mas trahado cu WEB. “Pero tin companianan cu a duna cero!” el a bisa. E sindicalista ta haya cu e situacion aki no ta na su luga y e ta hopi malo. Pero e ta sinti cu gobierno no a cumpli cu e responsabilidad cu nan a haya for di inicio, y awor nan ta acepta cu e situacion aki bay for di man.

E ta haya colmo cu gobierno no a cumpli cu un carta caminda ta poni cu nan mester duna un relato financiero general di cuanto placa e contribucion di 12.6% y tambe cuanto e suma ta bay ta di cada compania pa nan tene cuenta cune. Mientras cu WEB si a cumpli cabalmente cune. “Unda e control di gobierno ta! Negligencia di otro ta bira nos problema!” asina presidente di SIWA a reacciona.

For di dialuna ta circula e carta cu director di WEB NV, Sr. Luis Oduber den nomber di gerencia di e compania estatal aki ta confirma cu nan ta honra e peticion cu presidente di sindicato SIWA, Sr. Eric Henriquez a base di articulo 8 inciso 3 di e protocol di 18 di mei 2020.

Nan ta stop e retencion riba salario di e miembronan di SIWA entrante luna di november 2020. “Esaki pa motibo cu a resulta cu e empleadonan di e mayoria di e entidadnan/companianan di gobierno no ta aporta na e Fondo di Solidaridad pa FASE,” asina e carta firma pa Sr. Luis Oduber, ta bisa textualmente.

Protocol

Presidente di SIWA a referi specificamente riba e articulo di e protocol menciona cu entre otro nan a firma. Den dje ta para cu si acaso ta bin resulta cu tin companianan no a cumpli cu e mandato poni den e carta di Prome Minister pa deposita e placa pa e fondo di solidaridad na e cuenta di banco na Centraal Bank Aruba(CBA), nan ta keda cu e opcion di sali afo.

Ta asina cu na cuminsamento di november, SIWA a bin ripara cu e minister di Finanzas y Asunto Economico, Xiomara Maduro a pone den social media cu di e 25 companianan y instancianan estatal cu a wordo pidi pa aporta na FASE, ta bin resulta cu shete compania so tabata cumpli cu e fondo di solidaridad. “Ora cu e cos a bira hot, e ora si nan a admiti cu nan a faya,” e sindicalista a declara.

 

E matutino aki a haya sa pa medio di otro fuente cu e companianan cu a contribui cu FASE ta: WEB, VKB, SVb, Utilities, AZV, CBA y SETAR. Pero a bin resulta -segun presidente di SIWA- cu no ta shete sino cu ta cinco of cuater so cu a contribui cu e fondo di solidaridad, ya cu tin hendenan di e hunta di comisario cu nan trahadonan cu no a duna net nada.

“E ora ey nos a bisa: warda…warda…warda! Con cu nan no a duna nada?,” el a bisa. Pa busca contesta riba nan preguntanan y malcontento, nan a tene un reunion cu minister di Finanzas y Asunto Economico. Den e reunion aki – segun Sr. Henriquez – e mandatario a bin admiti cu ta berdad cu tin companianan cu no a duna nada.

Ademas e mandatario a bisa SIWA cu nan no por bula afo, ya cu esaki ta un condicion di Hulanda pa pais Aruba por haya fiansa. Esaki a haci cu e malcontento a bira mas grandi cerca e dirigentenan di SIWA. Ya cu di un banda nan ta haya cu mientras e mandatario ta bisa nan cu no por bula afo pasobra e ta un condicion di Hulanda. Di otro banda un gran mayoria di e compania no a duna nada durante 6 luna. Mientras cu nan di WEB a entrega mas cu 1.5 miyon na e fondo di solidaridad (FASE).

“Dicon pa nos si y pa otro nan no! E cos aki ta discriminatorio,” segun presidente di SIWA. E sindicato a bin cu e decision cu si e otronan ta cumpli nan ta sigui, pero si nan no cumpli, tampoco nan no ta sigui. “Si nan no ta cumpli nos ta sali afo. Asina simpel ta!.”

Peticion y solidaridad

Henriquez a lamenta cu a tarda hopi pa nan por haya un confirmacion riba nan sospecho. Ya cu for di dia 4 di november nan a pidi un reunion cu gobierno a base di loke minister di Finanzas a post den social media. Pero a tarda casi 4 siman pa haya e reunion mes cu e mandatario aki cu a admiti cu berdad mayoria di companianan no ta contribui cu FASE. P’esey SIWA kier a reuni cu Prome Minister, Evelyn Wever-Croes, riba e mesun topico aki. “Nos no a tende nada di dje!” el a bisa.

E fondo aki ta uno di solidaridad. Henriquez a bisa cu nan no tabata obliga, pero e peticion cu nan a haya na maart for di gobierno tabata pa tur e compania estatal, sin excepcion por contribui cu e fondo di solidaridad aki. E tempo aya minister president mes a haci un peticion pa entrega 12.6% via Centraal Bank Aruba na e fondo di solidaridad conoci como FASE. “Esey tabata e peticion di gobierno,” el a bisa.

Unabes cu e peticion aki a wordo haci durante un reunion na edificio Cocolishi a start e discusion, unda SIWA tambe tabata presente, riba e punto aki cu e sindicalista a cualifica como un discusion sano. El a splica cu den nan caso como empleado di un compania estatal ta diferente.

Apesar cu nan ta traha pa un compania estatal, nan no ta ambtenaar. Gobierno ta hefe directo di ambtenaar. Mientras cu den nan caso como trahadonan nan hefe directo ta Gerencia di WEB NV. P’esey SIWA como representante di e trahadonan a bay sinta negosha con pa entrega e 12.6%.

El a splica cu den e reunion general cu SIWA a tene entre nan miembronan a dicidi pa medio di un votacion entrega 12.6% di nan salario na e fondo di solidaridad. Pa negosha esey nan a traha un protocol unda tabata para loke nan a keda di entrega y pone den un cuadro legal. Y el a haci referencia na e contenido di e articulo 8 di e protocol menciona mas ariba, ya cu nan a cumpli cu e protocol cu a wordo firma nada mas ni nada menos.

Awor cu SIWA ta ripara cu mientras cu nan miembronan a contribui cu 1.5 miyon florin na e fondo di solidaridad, otro companianan of instancia estatal no a haci. E pregunta ta si SIWA lo reclama pa haya nan placa bek, mirando cu un gran mayoria no a cumpli cu e protocol firma.

El a bisa cu SIWA por bin cu un caso pa gobierno paga nan bek ya cu esaki no ta culpa di WEB. Sinembargo e ta realista cu e placa cu nan a paga na CBA a bay caba. “Di e leu ey mi no ta kere cu nos lo bay yega,” segun Henriquez.

 

 

 

LEAVE A REPLY

Please enter your comment!
Please enter your name here