Presidente Donald Trump a designa ayera e Cuerpo di Guardia Revolucionario di Iran, como “organisacion terorista stranhero”, den un campaña di su gobierno pa aumenta presion riba e regimen teocratico.
Ta trata di un medida sin precedente, ya cu nunca antes Departamento di Estado di Estadonan Uni a inclui un entidad gubernmenal di otro pais den su lista, manera e comunicado oficial firma pa Trump ta bisa.
“E paso sin precedente aki ta reconoce e realidad cu Iran no ta solamente un estado patrocinador di terorismo, sino tambe cu e Guardia Revolucionario ta participa, financia y promove terorismo como un herment estatal,” e texto ta bisa.
Ta spera cu e medida aki lo aumenta mas ainda e isolamento di Iran y ta laga bon cla cu Merca no lo tolera e apoyo di Teheran na gruponan rebelde cu ta destabilisa Medio Oriente.
“Cuerpo di Guardia Revolucionario ta e principal medio di gobierno di Iran pa dirigi y implementa nan campaña terorista global,” e comunicado oficial ta bisa. “E medida ta laga cla e riesgonan di haci negoshi cu, o provee apoyo, na e Guardia Revolucionario. Si bo hacie, bo lo ta financiando terorismo,” e ta agrega.
Pero e designacion por trece otro implicacion, ya cu e regimen a menasa cu represalia si inclui Guardi Revolucionario den e lista unda ta aparece tambe Al Qaeda, Estado Islamico, Hezbollah y Hamas, entre otro.
E Guardia Revolucionario a surgi na 1979 despues di e Revolucion Islamico cu a deroca Shah di Persia y a instala e actual regimen teocratico dirigi pa e ayatolanan.
A crea e cuerpo como un rama di Forsanan Arma di Iran pa proteha e regimen teocratico y e republica islamico. Actualmente e ta conta cu 120.000 miembro, entre unidadnan na tera, naval y aereo, ademas cu su division Quds, di operacion den exterior.
