Atrobe, mientras gobierno ta tene nos den scur kico mester sucede den e aña dificil aki, cierto claridad ta bin di e Colegio di Supervision Financiero CAft. E organismo aki a publica su conseho riba presupuesto 2021, cu segun gobierno lo por ta na Parlamento pa fin di februari. Cu e conseho ta duna solamente algun cifra general, cu en todo caso ta indica e situacion serio cu nos finanzas publico ta aden.

Nos por comproba cu enberdad e situacion no ta drecha ainda y cu por cierto entrada di gobierno lo ta hasta menos cu na 2020. Esaki tin varios motibo. Un di nan ta cu gobiernolo haya menos entrada na dividendo di empresa y otro entidad estatal, cu tambe a haya nan golpi di e crisis di Covid-19. Pero tambe tin menos entrada pasobra gobierno a dicidi di duna un rebaho di tarifa di loonbelasting di 2% pa e aña aki, algo cu CAft ta desconseha. Sea ta revoca e decision, o ta aumenta otro impuesto pa compensa e perdida aki. Segun CAft mester sigui e mecanismo recomenda pa IMF unda ta move di impuesto directo (loonbelasting) pa impuesto indirecto, cual logicamente lo ta e BBO, o accijns y/o invoerrechten… Punto no ta si gobierno gusta of no, e punto ta cu si Conseho di Ministro di Reino sigui conseho di CAft, e asunto aki por termina den un ‘aanwijzing’ o, gobierno ta cumpli cu esey, pa no risca e ayudo financiero di Hulanda. Na e altura aki, no por permiti esey.

Pa loke ta entrada pa gobierno por probecha un poco di un economia mehora. Gobierno ta pensa riba un aumento di GDP nominal di 5,6% loke CAft tambe ta haya realistico. Mester tuma na cuenta si cu esaki ta djis un regreso parcial for di e abismo grandi cu e crisis di coronavirus a pone nos. Nos por tin fin di 2021 un GDP nominal di Afl. 4.521 miyon, cu ta un mehoracion di Afl. 239 miyon compara cu 2020, pero ainda ta hopi leu di e Afl. 5791 miyon cu gobierno ta maneha como GDP pa 2019. Asina aki por dura varios aña pa bolbe na e nivel di 2019. Por tin un recuperacion mas rapido, pero esey ta depende di recuperacion di turismo, cu por ta mas rapido pasobra infrastructura di e sector aki ta ‘in place’ caba.

En todo caso, mas desempleo, di e negoshinan cu ta sucumbi, y menos entrada ta haci cu 2021 no lo ta mihor cu 2020, a pesar di e crecemento economico modera. Nos lo mira un presupuesto cu un deficit di mas di 23% di GDP, na lugar di e surplus di 1% programa na 2018. Esey ta trece naturalmente e pregunta kico por haci pa limita gastonan fiho. CAft ta constata cu gobierno tin pensa di economisa Afl. 11 miyon na gasto di personal, pero di otro banda ta aumenta e 5 miyon cu a resrva na 2020 pa cupo di trabao extra, considera absolutamente necesario, tena Afl. 8 miyon… Pregunta ta con serio e tipo di maneho contradictorio aki ta, aparte di e punto cu CAft no ta atende, pero nos aki si, cu e preocupacion ta keda cu e austerisacion di e gasto mas grandi di gobierno, di personal, a haya un reduccion minimo, cu ta trece e siguiente pregunta, si ta prudente pa bay fia tanto placa pa paga salario… No mester lubida cu gasto di personal ta, si inclui e salarionan subsidia, como mitar di e presupuesto total di gobierno.

Tambe CAft ta señala cu den e presupuesto no por mira bon ta unda e acuerdonan den cuadro di e Landspakket ta ubica, y ta recomenda pa clarifica esaki. Den anterior edicion di nos Editorial nos a anticipa esaki, comentando cu na fin di februari nos ta haya un presupuesto undamester busca pa haya sa unda e medidanan ta scondi.Nos ta contento cu esnan cu CAft ta señala e mesun problema aki. Asina mes, ta keda dificil pa comprende cu tin un presupuesto,, cu medida aden pa atende cierto problema, pero nos no sa ainda con ta bay atende e problema principal: nos ta bay cubri e diferencia abismal entre entrada y gasto, fiando tur esaki? Si nos debe publico lo tabata na 116% di GDP na fin di 2020, nos ta bay den direccion di 140% pa fin di 2021? Ta notable cu, manera menciona anteriormente, economia(GDP) ta crece cu algo mas di 200 miyon florin, y nos ta bay fia un suma multiple di esaki den e mesun aña?Y si 2022 tambe resulta den un aña di crecemento menor, nos ta keda fia den e mesun ritmo aki? Ta bunita cu ta pone den e metanan gubernamental cu mester baha gasto di personal te 10% di GDP, pero e mesun suma di gasto di personal, cu na 2019 tabata na mas di 12,5%, awor ta hopi mas, mas di 16% di GDP, y pakico? Pasobra GDP a cay enormemente, te na Afl. 4.277 miyon na fin di 2020. Esey ta implicacu pa cumpli cu e meta poni den e programa di implementacion di COHO, di 10% maximo di GDP, mester tuma medida mas robusto. Den e aña di eleccion aki, no tin nada di regalo pa priminti pueblo…

LJMADURO –14-FEB-2021

LEAVE A REPLY

Please enter your comment!
Please enter your name here